Diokno dumepensa sa SSS pension hike

MANILA, Philippines – Iginiit kahapon ni Budget Sec. Benjamin Diokno na hindi dapat paabutin sa lamesa ni Pangulong Duterte ang isyu sa pension hike ng mga pensioners ng Social Security System(SSS).

Sinabi ni Sec. Diokno, magkaiba ang kandidatong si Rodrigo Duterte noong eleksyon sa nakaupong Pangulong Duterte na nangako ng pension hike sa SSS retirees.

Ayon kay Diokno, kakaiba na ang sitwasyon ngayon dahil nakaupong Pangulo na ito at may mga pangako noong eleksyon na hindi puwedeng magawa kapag ito ay nasa gobyerno na.

Wika pa ng DBM chief, hindi naman makatwiran na gamitin ang tax payers money para lamang pondohan ang dagdag pension ng mga SSS pensionaires.

Idinagdag pa ni Diokno, hindi kailangang i-veto ng Pangulo ang resolusyon bagkus ay dapat ibalik lamang niya sa SSS board upang sila ang magdesisyon at lumutas sa usaping ito.

May pangamba ang mga economic managers ng Pangulo na masaid ang pondo ng SSS kung ibibigay ang P2,000 na pension increase.