Junior netters magpapaluan sa Andrada Cup ngayon

MANILA, Philippines – Magtatagisan ang pinakamatitikas na junior netters sa bansa sa paglarga ng 28th Andrada Cup ngayong araw sa Rizal Memorial Tennis Center.

Ilan sa masisilayan sa aksiyon sina Mindanao players Janus Ringia at Gennifer Pagente na nagkampeon sa Philippine Tennis Association (Philta)-PSC Age Group Championships.

Hawak ni Ringia ng Koronadal, South Cotabato ang top seeding sa 18-under gayundin si Pagente ng Cagayan de Oro City na No. 1 naman sa 16-under.

Ang iba pang top seeds ay sina John David Velez (boys’ 14-under), Andrei Jarata (boys’ 12-under), Macie Carlos (girls’ 14-under) at Tennielle Madis (girls’ 12-under at 10-under unisex).

Magiging daan ang torneo upang makabuo ng pambansang delegasyon na sasabak sa apat na malalaking international tournaments sa taong ito.

Gaganapin ang ITF/ATF Division 14-Under, Junior Davis Cup at Junior Federation Cup sa New Delhi, India sa Enero 28 hanggang Pebrero 12 gayundin ang ITF-ATF 14-Under, JDC at  JFC pre-qualifying, JDC final qualifying at JFC final qualifying.

Lalarga naman ang World Juniors Tennis Championships pre-qualifying sa Pebrero 27 hanggang Marso 4 sa New Delhi, India habang ang final qualifying ay itatanghal sa Marso 20 hanggang 25 para sa boys at sa Marso 27 hanggang Abril 1 para naman sa girls sa Bangkok, Thailand.