Bala nitugpa sa internetan
CEBU, Philippines – Nitugpa ang saag nga bala sa internetan sa Phase 2, Block 13, Lot 32 sa Deca Homes Subdivision sa Dumlog, dakbayan sa Talisay niadtong Huwebes sa hapon.
Si Christy Barangan, 35-anyos, tag-iya sa internetan, ang nitawag sa kapolisan mahitungod sa saag nga bala nga ilang nadiskubrehan.
Matud ni PO1 Othelo Victor Largo sa Talisay City Police Station nga .9mm nga bala ang ilang duda sa stray bullet nga ilang nakuha.
Asoy pa ni Largo nga posible nga gipasalba kini tumong sa ibabaw hangtud nga nitugpa ang bala sa atop sa internetan lahos sa yuta.
Nagkanayon si Largo nga swerte kay wala’y naigo nga mga bata nga nagduwa og internet niadtong higayuna.
Sigun pa ni Largo nga dali silang nagsusi-susi sa lugar kung duna bay nadungog ang katawhan nga masipang buto apan walay nakadungog bisan usa.
Hinuon ang ebidensya ilang gidala sa ilang buhatan ug gi-turnover ngadto sa crime laboratory alang sa dugang pakisusi kun kinsa ang responsable sa pagpabuto sa armas.
Nanghinaut si Largo nga unta walay mga tawo nga iresponsable nga magpabuto sa ilang armas atol sa pagsugat sa Bag-ong Tuig karong tungang gabii aron luwas ang tanan. - /GMR) (BANAT NEWS)
- Latest