Bato at iba pang opisyales tumakbo sa ‘Goodbye De Lima’
MANILA, Philippines - Napatakbo si Philippine National Police (PNP) Chief P/Director General Ronald ‘Bato’ dela Rosa at iba pang mga opisyal ng pulisya matapos na biglang umusok ang “Goodbye De Lima”, isang uri ng bawal na paputok na iniinspeksyon ng mga ito sa Bocaue, Bulacan kahapon ng umaga.
Batay sa ulat, pinangunahan ni Dela Rosa ang pagi-inspeksyon at pagkumpiska sa mga bawal na paputok na nakatinda sa Bocaue, ang firecracking capital ng bansa at habang ipinakikita sa media ang sari-saring uring mga bawal na paputok ay biglang umusok ang nasabing paputok na “Goodbye De Lima”.
Sa matinding pagkagulat ay naipasa pa ni Dela Rosa ang bawal na paputok kay Bulacan Provincial Police Office (PPO) Director P/Sr. Supt. Romeo Caramat Jr., bago ito naihagis ng nasabing opisyal.
Nagmistulang comedy ang eksena matapos na magtakbuhan sina Dela Rosa at iba pang mga opisyal mula sa umuusok na paputok na agad namang binasa ng tubig ng mga opisyal ng barangay upang mapigilang sumabog.
Muling pinaalalahanan ni Dela Rosa ang publiko sa masamang epekto ng bawal na paputok kaugnay ng pagsalubong sa Bagong Taon.
Bukod sa Goodbye de Lima kabilang pa sa mga ipinagbabawal na paputok na kinumpiska ng pulisya ay ang super lolo, kabase, Goodbye Philippines, plapla, atomic bomb at OG thunder.
- Latest