Anibersaryo sa pagkahimugso

Karong adlawa maoy ika-48 nga kasumaran sa pagkahimugso sa Alpha Theta Omega, ang fraternity diin usa ako sa liboan ka mga sakop. Ug akong itunol ang akong mainitong pahalipay ngadto sa mga kaubanan nako niining maong prestihiyosong organisasyon.

Sa liboan ka Althonians kinsa nakabase karon sa upat ka suok sa kalibotan, espesyal karon nga adlaw. Alang kanila, panahon na usab karon sa pagtapok aron hisgotan ang mga butang nga ikaayo ug ikapalambo pa sa organisasyon sa umaabot nga katuigan.

Ang kasaulogan karong tuiga nagtakdo usab sa grand convention nga kamulong gipahigayon karon didto sa dakbayan sa Iligan. Ang maong katiguman maoy mohan-ay sa mga palisiya nga maoy tumdanan alang sa dugang kalamboan sa organisasyon.

Ambot kun asa na usab ang sunod nga grand convention. Apan alang namong ania nagbase sa Sugbo, dako among panghinaut nga ari na usab ipahigayon ang sunod nga kalihokan. Apan kun dili man sa sunod nga edisyon, among paghandum nga matuman kini sa umaabot nga panahon.

Dako na og nakab-ot ang Alpha Theta Omega. Gikan sa pagkahimugso niini pipila na ka dekada ang nakalabay, dili na matukib ang kalampusan niining maong organisasyon, ilabina sa natad sa community service.

Dinhi sa Sugbo, isip usa sa mga lokal nga adviser sa maong grupo, malipayon nakong ipahibalo ang namugna nga mga serbisyo publiko sa komunidad. Kini sama sa mga relief mission panahon sa kalamidad ug mga feeding program sa mga kabaranggayan.

Gani, daghan pang mga programa ug proyekto pagtabang sa paglambo sa komunidad ang giplano karon sa mga Althonians dinhi sa Sugbo. Kini isip pagsanong usab sa dakong misyon sa maong organisasyon pagtabang niadtong mga nanginahanglan.

Ug niining espesyal nga adlaw sa kasaulogan sa annibersaryo sa pagkahimugso sa Alpha Theta Omega, akong itunol ang akong pasalamat sa matag usa ka sakop nga kuging misanong sa kawsa sa organisasyon dili lamang alang sa kalamboan sa maong grupo kondili alang usab sa serbisyo paghikap og mga kinabuhi.