Determinado ang Azkals

MANILA, Philippines - Walang ibang nasa isip ang Philippine Azkals kundi ang talunin ang Indonesia upang manatiling bukas ang kanilang pintuan para sa isang tiket sa semifinal round sa Group A ng 2016 AFF Suzuki Cup.

Lalabanan ng Azkals ang Indonesia ngayong alas-8 ng gabi sa Phi-lippine Sports Stadium sa Bocaue, Bulacan at umaasang mabibigyan ng solidong suporta ng mga Pinoy fans.

“We are ready and fit. We have to beat them (Indonesia). They have an incredible offense, we saw that in their game against Thailand,” sabi ni Azkals head coach Tom Dooley.

Nanggaling ang Azkals sa 0-0 scoreless draw sa kanilang unang laro ng Singapore noong nakaraang Sabado sa pagsisimula ng AFF Suzuki Cup.

Muling makakakuha ng matinding hamon ang mga Pinoy booters sa pagharap sa mga Indonesians na pinahirapan ang nagdedepensang Thailand bago naisuko ang 2-4 kabiguan.

Binusisi na ni Dooley ang mga kahinaan at kalakasan ng Indonesia bilang preparasyon sa mahalaga nilang laro.

At may nakita siyang bagay na maaaring pumabor para sa Azkals.

“Their defense is a little bit weak. We have to strategize against them. We’re frustrated and upset that we couldn’t score (against Singapore), but nothing has changed. I can see the positive spirit from the guys,” wika ni Dooley.

Pinaghandaan na rin ni Indonesia coach Alfred Riedl ang Azkals, babanderahan nina Phil Younghusband, Stephan Schrock, James Younghusband, Manny Ott at Misagh Bahadoran.

 “This team is difficult to play against. It will be tough for us. They have the home advantage, and they’ve beaten us already two years ago in Manila, so we will have to be careful,” ani Riedl.

Samantala, nagsosyo sa liderato ang Malaysia at Vietnam sa Group B nang talunin ang Cambodia, 3-2 at Myanmar, 2-1, ayon sa pagkakasunod.