Pacquiao naniniwala sa rebelasyon ni Kerwin
MANILA, Philippines – Naniniwala si Senador Manny Pacquiao sa mga rebelasyon sa kanya ng hinihinalang drug lord na si Kerwin Espinosa.
Sinabi ni Pacquiao sa panayam ng DZBB kahapon na, nang dumating sa bansa si Kerwin noong Biyernes mula sa Abu Dhabi at magkausap sila, nakakagulat anya ang mga ibinulgar nitong mga personalidad na sangkot sa illegal drug trade kabilang ang mga elected officials.
“Marami siyang sinabi at talagang nakakagulat. Hindi ko na siguro banggitin mga binanggit niya kasi magkakaroon naman siya ng affidavit,” wika pa ni Pacquiao sa panayam. “Sa tingin ko, kapanipaniwala naman [ang mga sinabi niya] kasi sa detalye ng ipinapahayag niya,” giit pa ng mambabatas.
Samantala, pinabulaanan ni Whistleblowers Association of the Philippines Sandra Cam ang mga ispekulasyong dinidiktahan umano niya ang batang Espinosa.
Aniya, ang mga nagpapalabas ng espekulasyon ay mga taong sangkot sa illegal drug trade at isinangkot ni Kerwin.
Matatandaang si Cam ay personal na nakipag-usap kay Kerwin sa Abu Dhabi bago pa man ito nadala ng mga otoridad pabalik sa Pilipinas.
- Latest