Ginagmay nga negosyo alang sa kalalakin-an
CEBU, Philippines - Gipasiugdahan karon ang ginagmay nga negosyo alang sa kalalakin-an isip tugbang sa nagmalampuson nga ginagmay nga negosyo sa mga kababayen-an pinaagi usab sa pagtabang sa Mandaue Chamber of Commerce and Industry (MCCI) uban sa pag-ayuda sa San Miguel Brewery Inc. Foundation.
Ang Men in Business (MIB) program gitumong nga ang kalalakin-an usab adunay dakong kaakohan sa panginabuhian sa ilang tagsa-tagsa ka mga pamilya.
Si Romelinda Garces, co-chair sa MIB program niingon nga daghan na sa mga gipalambo nga programa alang sa mga kabus nga kababayen-an nga nahimong nagmalampuson niining mga panahona.
Dugang niya nga daghan sab karon sa mga lalaki ang nanginahanglang og tabang ug ang sagad kanila wala gyud mahatagi og kahigayonan sama sa ginagmay nga patigayon.
Ang MIB program nakapahigayon na og pasiuna pinaagi sa San Miguel Brewery Inc. Foundation ug gisagop na sa MCCI ang mga nisalmot niini nga mga lalaki sa Dakbayan sa Mandaue.
Matud pa ni Garces nga ang MCCI nidapit sa 27 ka barangays sa siyudad sa pagpadala og representante diin niabot kini sa 21 ka mga lalaki nga sagad anaa sa panuigon sa 45 ngadto sa 55 anyos.
Ang maong mga lalaki nga nagtinguha sa pag-apil sa maong programa, ilang gipaubos sa classroom set-up training ug kinahanglan nga sila motambong gyud. (BANAT NEWS)
- Latest