Bidding sa P250M nga heavy equipment gioktaba
CEBU, Philippines - Gioktaba sa Bids and Awards Committee sa Kapitolyo ang bidding sa P250 milyones nga heavy equipment human kini nasupla kagahapon.
Gawas nga usa sa mga bidders nga mao ang ConEquip Philippines ang wala kadawat sa gipaapas nga bid bulletin, wala usab kaabot sa pito ka adlaw nga tagal sa pagpublikar niini nga maoy gimando sa balaud. Si BAC chairman, Atty. Mark Tolentino, nideklarar nga ioktaba ang bidding aron malikayan ang pagkwestiyon kanila kung kini gipadayon pa kagahapon.
Karong semanaha subling ipublikar sa BAC ang papas nila nga bid bulletin aron paghatag og igong panahon ug masulod sa pito ka adlaw nga gikinahanglan nga mapahibawo ang mga bidders.
Subli nilang ipublikar ang pagwagtang na sa “G7 standard” nga unang gikwestiyon human ang BAC niinsister nga ang China-made ila gihapong dawaton. Ang G7 gilangkuban sa Amerika, France, Great Britain, Germany, Japan, Italy ug Canada.
Ang ConEquip nga kasagaran hinimo sa China ang ilang produkto ang nadeklarar nga mananaug sa unang bidding bisan sa labing mahal nga presyo sa ilang mga heavy equipment.
Tungod sa kontrobersiya, gideklarar ni Gobernador Hilario Davide III nga pakyas ang maong bidding.
Sa ikaduhang bidding, namatikdan nga ang ConEquip nakig-abin kini sa RDAK Transport nga adunay labing ubos nga presyo sa unang bidding.
Ang laing bidders mao ang TKC Heavy Industries Corporation, JVF Commercial, Civic Merchandising Inc. ug D’Limitless Vehicle Ventures Corp. (BANAT NEWS)
- Latest
