‘Silent rally’ gipahigayon sa taga Osmeña Shrine

CEBU, Philippines - Nipahigayon og silent rally ang mga residente sa Osmeña Shrine sa Kalunasan, Dakbayan sa Sugbo nga apektado sa demolisyon tumong nga ilang mahinabi personal si Mayor Tomas Osmeña.

Moabot sa 50 ka molupyo sa Osmeña Shrine ang nagtapok sa Legislative Building ug duna silay bitbit nga mga placards nga nanawagan kang Presidente Rodrigo Duterte ug kang Osmeña.

Matud ni Ramonito Delcampo, presidente sa Association of People’s Initiative, nga wala na gyud silay laing mahimo aron makapadayag sa ilang sentimento.

Si Konsehal Jose Daluz III kinsa maoy nakig-atubang sa mga residente niingon nga angayan gyud unta nga hatagan og higayon ang mga hingtungdan nga madungog sa mayor.

Si Osmeña sa iyang bahin niingon nga ang mga residente mahimong makighinabi kang de facto City Administrator Bimbo Fernandez.

Matud sa mayor nga sukad nangangkon ang mga molupyo nga gipasaligan niya sa niaging kampanya sa eleksiyon, nawagtangan na sila og kredibilidad.

Gitataw sa mayor nga dili siya mohatag og relocation sa maong mga residente sanglit ilegal ang ilang pagpuyo sa dapit.

Gihagit hinoon niya ang mga residente nga mopasaka og kaso batok niya.

Gihulagway sa pangulo sa Division for the Welfare of the Urban Poor (DWUP), Genevieve Alcoseba, nga usa ka syndicated group ang naa sa Osmeña Shrine nga pasabot niini dunay tawo nga nagpaluyo sa mga lihok nga ilang gibuhat.

Nasayran nga dunay gitagana nga pundo ang siyudad aron pagkoral sa Osmeña Shrine apan si Daluz niingon nga hayan dili kini aprubahan sa konseho. (BANAT NEWS)