Ombudsman ug CHR kuwestiyonable na

Ang kasagrado sa Ombudsman ug sa Commission on Human Rights namantsahan gyud og kolor sa politika kun ang mga tinudlo sa pagdumala ning maong mga constitutional bodies, utangan sa mga nag-appoint nila.

Unahon nato ang Ombudsman. Si Ombudsman Conchita Carpio-Morales nakapuli sa puwesto sa laing kontrobersiyal nga si Merceditas Gutierrez. Kini pinaagi sa pinugos nga pagpapahawa kang Gutierrez pinaagi sa impeachment sa Ubos Balay Balaoranan gamit ang pinuga nga gahum sa Liberal Party ug sa pagpanghawod sa Malacañang ubos ni Noynoy Aquino.

Napupos usab ang gahum sa kanhi CHR commissioner nga si Loretta Ann Rosales mao nga nakapuli si Jose Luis Martin “Chito” Gascon. Apan kini si Gascon nahimong Director General sa Liberal Party gikan sa 2008 hangtod sa 2011. Subo kaayong palandungon nga kining duha ka mga constitutional bodies mahimong “attack machine” sa oposisyon. 

Wala koy kuwestiyon sa Liberal Party. Daghan ko og amigo nga sakop sa LP. Apan kun dayag sa mata sa katawhan ang kumboya sa Ombudsman ug CHR aron dauton ang kasamtangang administrasyon, nagtuo ko nga kinahanglan na malili ug matuki og balik ang konsepto sa “independence” niining duha ka constitutional bodies.

Nakatuki ko niini tungod sa mga panghitabo sa nasud karon. Si PNP Chief Bato dela Rosa miangkon sa interbiyu sa telebisyon nga si Senador Manny Pacquiao ang migasto sa iyang biyahe didto sa US aron pagtan-aw sa Pacquiao-Vargas fight.

Dali kaayong naka-react si Ombudsman Morales nga iya kining imbestigahan. Aw, tinuod man gyud nga ang mga opisyal sa gobiyerno gidid-an sa pagdawat og regalo. Apan kining maong balaod sa “bribery” klaro man nga gidili kun ang regalo gitumong aron pagsuborno sa opisyal sa gobiyerno aron makakuha og pabor.

Unsa may pabor nga makuha ni Heneral Bato dela Rosa sa pagpalibre ni Pacquiao? Matuboan siya og buhok sa iyang ulo? O si Manny mahimong makahawok sa ulo ni Bato?

Sa dihang gitumba si mayor Rolando Espinosa Sr. sa prisohan sa Baybay, Leyte, si Ombudsman Morales mipahibalo nga mohimo usab sila og “parallel investigation.”

Akong pangutana kang Morales: Misulay ba siya og imbestigar kang Senador Leila de Lima sa kalambigitan niini sa mga druglord sa Bilibid? Misuway ba kini og susi sa bodyguard nga PSG ni de Lima nga gihimong kolektor? Misusi ba siya sa binilyon ka pesos nga pundo alang sa mga biktima sa Yolanda nga gikawkaw?

Tinuod nga ang CHR gitahasan pagprotehir sa katungod sa katawhan batok sa abuso sa gobiyerno. Apan wala kini magpasabot nga gamiton ang gahum niini aron sa pagdaut sa kasamtangang administrasyon.Wala pa gani makasugod sa imbestigasyon, mi-conclude na ang CHR nga sad-an na ang gobiyerno. Kaayong kusion niining Gascon.