Tam-is nga pinaskohan!

Kumusta na kaha ang mga durugista nga misurender nunot sa programa sa Philippine National Police nga Oplan Tukhang?

Dili ikalimod nga adunay mga nanurender na nga nagpadayon gihapon sa illegal nga kalihokan.

Kini tungod sa ka huyang sa programa nga makasuporta unta kanila sa gitinguha nga pagbag-o sa ilang kinabuhi.

Apan sa Brgy. Pajo sa dakbayan sa Lapu-Lapu nasustinihan nila ang pag-agak sa mga surrenderers ngadto sa kahingpitan sa ilang pagbag-o.

Sila ang gitawag nga "New Life Pajoanon" nga giumol sa ilang kapitan nga si Ahong Chan diin adunay dul-an sa usa ka gatos ang miyembro.

Sukad sa ilang pagtahan gihatagan dayon sila og panginabuhian  nga maoy makig-alayon sa mga negosyante o kontraktor nga magpa-job out.

Ang mga surrenderers ang mohimo sa gimbuhaton bugti sa sweldo nga dili moubos sa 300 pesos.

Karong panahon sa pasko ang mga surrenderers ang lakip sa responsable sa pagpamutang sa mga maanindot nga dayandayan sa center island sa ilang barangay.

Usa kanila ang mipadayag nga walay sama ka tam-is nga pinaskohan ang iyang ikahatag sa iyang pamilya ang pagtalikod niya sa bisyo tungod sa suporta sa ilang mga opisyal.

Gani nasaksihan nako nga murag nabali ang panahon sa Brgy. Pajo sanglit ang mga nalambigit naman sa drugas mao na ang manokhang o motuktok hangyo sa ilang kapitan sa barangay aron magpasakop sa grupong new life.

Kun nahimo kini sa barangay Pajo, walay rason nganong dili mapatuman sa uban nga mga barangay o mga local government units.

Dili lang kutob sa pulong kondili ipakita sa buhat ang pag-agak sa mga nahisalaag ngadto sa hingpit nga pagbag-o.