Combo-building tukoron sa Talisay
CEBU, Philippines - Gikatakdang tukoron unya ang edipisyo nga mag-usa sa mga opisina sa command center, kapolisan, kabumberohan ug uban pa sa dakbayan sa Talisay sunod tuig.
Si City of Talisay Mayor Eduardo Gullas nakigtagbo sa mga representante sa Aboitiz company diin gituki nila ang tinguha sa maong kompanya nga motukod og edipisyo nga tawgon og combo-building nga libre.
Ang mayor niingon nga ang luna nga kabutangan sa maong building mao ray itugbang sa siyudad ug ang Aboitiz Foundation na maoy mogasto sa pagpatukod.
Matud ni Mayor Gullas nga sa sulod sa city hall compound ibutang ang maong edipisyo.
Sila si Eric Ching ug Bengin Mendezona maoy niatubang nga representante sa Aboitiz atol sa maong panagtagbo diin uban ni Gullas ang mga department heads sa city hall
Asoy pa sa mayor nga dakong tabang kini kanila mao nga ila kining pahimuslan alang sa pagpalambo pa sa serbisyo ngadto sa mga Talisaynon.
Si Ching niingon nga gipili nila ang dakbayan sa Talisay kay ilang nakita nga wala pa sila’y pasilidad o edipisyo nga sama niini.
Asoy pa niya nga kinahanglan na gyud og one stop shop service ang Talisay tungod sa nagpadayon niini nga pagsaka sa populasyon ug paglambo. (BANAT NEWS)
- Latest