NLEX naghari sa Recoletos Cup

CEBU, Philippines - Ang NLEX Road Warriors madasigon nga mibangon human malubong og 22 puntos sa ikaduhang kuwarter ug dayon nagsandig sa nagkayong opensiba ni Garvo Lanete sa overtime aron pagbuntog sa ilang sister-team nga Meralco Bolts, 98-94 ug ingon man pagdominar sa 1st Recoletos Invitational Cup atubangan sa kapin sa 3,000 fans nga nagdasok didto sa University of San Jose-Recoletos Coliseum sa Barangay Basak, dakbayan sa Sugbo niadtong Biyernes sa gabii.

Si Lanete mibubo og 14 sa iyang 19 puntos sa dugang singko minutos sa duwa apil na niini ang sagunson niyang 3-pointers ug krusyal nga free throws nga maoy nakaputol sa linya sa Bolts.

Nindot unta ang sinugdanan sa Meralco human ilang giablihan ang duwa pinaagi sa 13-0 run. Nakagukod man tuod ang NLEX, apan ang Bolts nanginit sab dayon og balik ginamit ang 18-1 rally nga maoy nakahatag kanila og komportabling 43-21 nga labaw sa oras nga 2:41 sa dili pa ang halftime. Apan hinay-hinay nga migukod ang Road Warriors dayon na ngadto sa pag-abante niini, 74-72 human sa itsa ni Raul Soyud sa nahabilin nga 3:54 sa regulasyon.

Sukad niadto, sikit na ang kumbati sa duha ka koponan ug katapusan naglabaw ang Bolts sa iskor nga 78-77 gumikan kay sila si Soyud ug Mac Baracael milusad og 7-2 run aron paghatag sa NLEX og 83-80 nga bentaha sa nahabilin nga 5.6 segundos.

Wala damha sa kadaghanan nga malugwayan pa diay ang engkuwentro sa duha ka kampo human si Basir Amir mipasud sa iyang tres dayong kapupos sa oras.

Sa overtime, si Ken Bono sa Meralco maoy unang nakaiskor, apan si Lanete miposa og duha ka tres sa 7-0 rally nga nakahatag sa Road Warriors og 90-85 nga labaw. Makasikit man tuod ang Meralco, apan kanunay sila nga pahilumon ni Lanete, nga wa’y sipyat sa unom niini ka free throws sa nahabiling 16 segundos aron pagsalbar sa NLEX. Miabag ni Lanete mao si Soyud nga mikadlit sab og 19 puntos, samtang sila si Baracael ug Eric Camson nagkumboya og 25 puntos sa Road Warriors

Si Joseph Yeo maoy nangu sa Bolts uban sa iyang 16 puntos ug gisundan  ni Bono nga dunay 13 puntos. Si Anjo Caram mitali og 12, samtang sila si Cliff Hodge ug Reynel Hugnatan dunay 11 puntos matag usa sa pilderong koponan. (BANAT NEWS)