Eleguin, Atillo gisubhan og daog
CEBU, Philippines - Gipakita dayon ni Edwin Dejacto Sr. ang iyang katakus diin miiskor siya og 26 puntos aron pangulohan ang Team Eleguin nga milubong sa Edgar & Tony, 85-66 sa pagsugod sa Power Forty Ballclub 50-above 1st Conference niadtong Martes didto sa Inayawan Sports Complex.
Gawas ni Dejacto, laing miiskor og double figures naglakip nilang Jun Cañete sa iyang 19 puntos ug Eugene Abellanosa nga adunay 16 puntos sa Team Eleguin nga mao kanunay ang naglabaw.
Tulo sab ka player sa Edgar & Tony ang mihimo’g double digits pinangulohan ni Rone Carbonilla pinaagi sa iyang 20 puntos. Si Joel Flordeliz miamot og 17 puntos, samtang si Eric Chiong mitampo’g 15 puntos.
Sa laing duwa, gisugat sab og daog ang Team Atillo dihang ila sab nga gilubong ang Team Rama, 111-95.
Balanse kaayo ang opensa sa team Atillo hinungdan nga wala sila maglisud pagkulit og daog.
Gipangulohan nilang Tony Ungria ug Titing Fuentes ang Team Atillo nga parehong milansang og 20 puntos, gisundan ni Teody Ebrado sa iyang 14 puntos ug Sammy Atillo nga adunay 12 puntos. Sila si Boy Pabillon ug Bert Cayobit mitimbre’g 11 ug 10 puntos.
Nangulo sa naparot nga Team Rama mao si Celso Cabaluna, kinsa miburak 30 puntos, apan wala kini mapusli kay gisubhan man og pilde ang iyang koponan. Si Michael Arias mitikdol og 22 puntos, si Romy Montuis miariya og 14 puntos ug si None Sabandeja mitimang og 13 puntos.
Misuway og gukod ang Team Rama, apan napakyas kini kay naglisud sila pagpugong sa nagpungasi nga mga opensa sa Team Atillo.
Ang liga nahimo pinaagi sa paningkamot sa ilang presidente nga si Domie Labalan. Ang liga nga giorganisar ni Vez Eleguin gipadagan ni commissioner Edwin Dejacto Sr.
Puntos matag usa
Unang duwa:
ELEGUIN (85) – Dejacto 26, Cañete 19, Abellanosa 16, Fuentes 8, Ybernas 7, Eleguin 5, Espinosa 2, Ozon 2.
EDGAR & TONY (66) – Carbonilla 20, Flordeliz 17, Chiong 15, Dayondon 8, Magallon 2, T. Navares 2, Lawas 2.
Ikaduhang duwa:
ATILLO (111) – Ungria 20, Fuentes 20, Ebrado 12, Atillo 12, Pabillon 11, Cayobit 10, Pestaño 9, Abapo 8, Cantarona 4, Abellana 3.
RAMA (95) – Cabaluna 30, Arias 22, Montuis 14, Sabandeja 13, Rama 5, Mosqueda 5, Dimitiman 4, Balansag 2. (BANAT NEWS)
- Latest