Kalag-kalag malinawon

CEBU, Philippines - Giisip nga malinawon ang paghandum sa Kalag-kalag sa Metro Cebu.

Gani si Cebu City Mayor Tomas Osmeña ang kontento sa seguridad nga gipatuman sa Doña Pepang Cemetery diin nahimutang ang mausoleum sa iyang apohan nga si Estafania “Doña Pepang” Veloso-Osmeña.

Pasado alas 10 kagahapon sa buntag nibisita ang banay’ng Osmeña sa sam-ang.

Nagmonitor ang mayor sa sitwasyon sa mga sam-ang sa siyudad ug kini niingon nga wala siya’y nadawat nga report nga dunay mga dili maayong panghitabo.

Apan nanghinaut si Osmeña nga magpabiling magbinantayon ang katawhan.

Hinoon nakadayeg ang mayor sa gipakitang trabaho sa kapolisan ug ubang grupo sa pag-mintinar sa kahapsay ug kalinaw sa mga sam-ang.

Sa Dakbayan sa Mandaue, si Chief Inspector Jimmy Aguisanda, deputy director for operations sa Mandaue City Police Office, niingon nga ang 300 ka polis nga naglakip sa mga wala nag-uniporme ang ilang gidestino sa mga sam-ang.

Giabagan ang kapolisan sa pagbantay sa kahapsay ug kalinaw sa mga civilian volunteers group nga naglakip sa guardians, radio group ug mga barangay tanod sa Guizo, Tipolo, Mantuyong ug Ibabao Estancia.

Si Police Officer 1 Peter Martinez sa operations sa MCPO niingon nga sukad sa niagi pang gabii higpit nga gibantayan ang pagdagsa sa mga tawo sa mga sam-ang sa Guizo diin nahimutang ang municipal cemetery, Catholic cemetery ug ang duha ka pribadong sementeryo diin gilubong ang mga inilang tawo sa siyudad nga nangamatay na.

Si Glenn Antigua, operations chief sa Traffic Enforcement Agency of Mandaue (TEAM), niingon nga ang ilang mga traffic enforcers nga gipangdestino sa mga dalan padulong sa mga sam-ang ang hangtud pa karong tungang gabii.

Malinawon sab ang mga sementeryo sa Dakbayan sa Lapu-Lapu.

Matud ni Senior Police Officer 4 Remegio Ngujo sa Lapu-Lapu City Police Office nga walay panghitabo sa mga sam-ang sama sa pagsakmit sa mga hait nga hinagiban.

Kini tungod kay gipahibawo na daan ang katawhan ug may gibutang sab nga tarpaulin sa gawas sa sementeryo sa mga gidili.

Dunay pipila nga gitugutan nga makadala og sundang sa tuyo nga ilimpyo sa mga nitso ug gibantayan og polis.

Ang mga sam-ang sa siyudad nahimutang sa Sitio Humay-Humay, Barangay Gun-ob ug Mactan Island Memorial Garden sa Marigondon.

Si Senior Police Officer 1 Laurencio Wagwag sa Lungsod sa Cordova niingon nga malinawon sab ang  ilang paghandum sa Kalag-kalag.

Ang kapolisan sa Dakbayan sa Talisay ang nipatuman sab og full alert status.

Si PO1 Romanito Dinapo sa Talisay City Police Station nibutyag nga sugod kagahapon sa buntag ila nang gihugtan ang ilang pagpatuman sa seguridad pinaagi sa pag-inspeksyon sa mga butang nga gidala sa mga tawo nga nisulod sa lima ka sam-ang.

Gipahimangnuan sab ang katawhan nga magbinantayon sa ilang kaugalingon ug mga butang ilabi na kun motipon sa daghang tawo.

Si Supt. Emerson Dante, hepe sa kapolisan sa dakbayan, nangayo og dugang pwersa sa Cebu Provincial Police Office (CPPO) aron ila gyud maseguro ang seguridad sa katawhan.  (/GMR)