Nagpakasal sa langyaw tungod sa saad nga dad-on sa gawas

Dear Atty. Divine,

Duna ko’y naila-ila nga foreigner pinaagi sa online, nagkarelasyon mi sulod sa lima ka buwan ug 3 years ago nagpakasal mi sa korte dinhi sa Cebu. Misugot ko nga magpakasal mi kay misaad siya nako nga iya ko nga i-petition ug dad-on sa Canada. Nagtipon lang mi sulod sa usa ka buwan ug human sa among kasal, mibalik siya sa Canada. Few months after siya mibalik sa Canada nagsige pa ang among communication ug miingon siya nga iya na nga gisugdan sa pag-process ang akong visa. Apan since last year, wala na man siya mokontak nako ug wa na gyud ko’y balita kaniya. Wa ko masayud kun unsay nahitabo kaniya. I admit nga wa ko mahigugma kaniya ug kun wa pa siya mosaad nako nga iya ko nga dad-on sa Canada, dili gyud ko magpakasal kaniya. Ang akong pangutana, balido ba ang among kaminyuon? Unsa may akong buhaton aron makaminyo ko pag-usab? - Menia

* * *

Dear Menia,

Bisan pa kun ang imong pag-uyon nga magpakasal mo tungod lang sa iyang saad nga dad-on ka sa Canada, apan base sa balaod nagpabilin nga balido ang inyong kaminyuon tungod kay wa ka niya pugsa pagpakasal kaniya. Ang kaminyuon mahimo lang nga dili valid kun wa ka makatuman sa mga rekisitos niini sama sa Marriage License, Marriage Ceremony ug ang consent freely given atubangan sa solemnizing officer or ang edad nga kinahanglan 18 years old and above ang parties.

Kun gusto ka nga magminyo pag-usab, mahimo ka nga magpa-annul sa imong kaminyuon pinaagi sa pagpasaka og Petition sa korte ug ang posible nimo nga ground niini mao ang Psychological Incapacity base sa Article 36 sa atong Family Code apan kinahanglan ka nga moduol sa imong abogado aron matun-an ang imong kaso ug aron ma-refer ka niya sa psychologist alang sa clinical assessment pagsuta kun aduna bay igong basehan ang pagpa-annul sa imong kaminyuon. - Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.