Prison Awareness Sunday Ang self-esteem ni Saqueo
Oktubre 30, 2016: Ikatloan nga Domingo sulod sa tuig mga Pagbasa: Kin. 11;22-12;1/Sal. 145/2 Tes. 1;11-2:2/Lk. 19:1-10
Dunay mga opinion nga nagkanayon nga sa tinuod kuno si Saqueo dili mubo nga tawo. Husto kuno ang iyang barog. Ang nakapahimo niyang mubo mao man ang iyang ubos nga panlantaw sa iyang kaugalingon, pagkangalan nga siya usa ka Kobrador sa Buhis. Kay lagi kaniadto ang mga kobrador sa buhis ang giisip man sa kadaghanan nga mga public sinners butang nga nakapahimo nilang ubos diha sa ilang mga kaigsuonan nga bisan kun anaa man kanila ang bahandi apan ang maong reputasyon maoy nakapahimo nilang moisip sa ilang kaugalingon nga mga inihid diha sa katilingban. Apan ang atong Ginoo sa dihang iyang giingnan si Saqueo sa iyang tinguha nga modayon sa pinuy-anan niini, nan, gibati ni Saqueo ang tumang kalipay. Kalipay nga nakapatukmod niya sa paghimo og hinanaling akto sa pagkamanggihatagon. Sa atong kinabuhi daghanan kanato ang nawad-an og umoy mismo sa atong kaugalingong pagkatawo. Kini tungod sa mga negative reinforcements nga kanato gibato sa kadaghanan. Apan bisan pa man niini, ang Dios nibuot nga palutawon ang bisan unsang nindot ngari nato kay nakita man niya ang atong bili ug dili ang atong kapakyasan. Ning atong pagsaulog sa Prison Awareness Sunday ato untang pagaisipon nga ang anaa sa mga bilanggoan tuod nakasala samtang ang uban gipasanginlan lamang, ang mahimong mga maayong tawo ugma damlag kun sila ug kita ang moisa sa ilang tagsa-tagsa ka mga kaugalingon ingon nga mga tawong mapuslanon ug dili mga tawong badlungon.
- Latest