Hulga sa Abu

Mitumaw na usab ang mga taho nga adunay mga sakop sa bandido nga Abu Sayyaf ang ania kuno sa Metro Cebu aron pagsabwag og kagubot. Niabot kuno ang maong mga terorista dinhi gikan sa Mindanao pinaagi sa dakbayan sa Dumaguete.

Gani adunay mga litrato sa mga sakop sa maong grupo nga ania na kuno sa Sugbo ang nanggawas sa media. Ang maong mga hulagway basi usab kuno sa intelligence report gikan sa otoridad nga nagpaniid sa maong mga terorista.

Apan negatibo diay kuno ang maong intelligence report, matud pa sa Police Regional Office-7. Kini human kuno sa pakisusi sa kapolisan sa mga Muslim communities dinhi sa Sugbo, matud pa sa usa ka official sa intelligence division sa PRO-7.

Maayo na lamang nga negatibo ang maong taho. At least, mao kini ang pahayag sa kapolisan. Kay kun tinuod pa ang intelligence report, kuyaw ang Sugbo nga mahisama didto sa dakbayan sa Davao nga bag-o pa lamang nga gibombahan sa mga dautang elemento.

Apan bisan pa man sa maong false alarm, angay lamang nga magmaigmat ang mga Sugboanon batok sa mga dautang elemento. Lisod na nga maunhan pa ang otoridad  niadtong mga buot nga mosabwag og kaguliyang dinhi sa atong lugar.

Mao nang maayo gayud nga motambayayong ang matag Sugboanon sa otoridad alang sa kampanya batok sa kriminalidad. Kay lisod nang mao na lamang ang atong mamat-an nga miatake na ang mga dautang elemento sa atong palibot.

Matag usa kanato angay gayud nga mopahat sa iyang bahin isip suporta sa lakang pagpatunhay sa kahusay ug kalinaw sa komunidad. Ug dili lamang usab kita magsalig sa kapolisan. Aduna kitay obligasyon isip responsable nga mga molupyo.

Milambo ang Sugbo isip sentro sa komersiyo sa nasud gawas sa Metro Manila tungod sa daghang mamumuhonan nga naingganyo pagbutang og negosyo dinhi. Ug dili ikalimod nga adunay dakong kalabotan niini ang kahusay ug kalinaw.