Binuhing hayop angay ilubong og tarong

CEBU, Philippines - Sa Adlaw sa mga Santos ug Kalag adunay mga tawo nga dili lang tawo nga nitaliwan na nga ilang handumon kay lakip nilang pahinungdan og mga pag-ampo mao ang minahal nila nga hayop nga nitaliwan na sab.

Usa niini mao ang pet lover nga desk editor sa CCTN Channel 47 nga si Randy Gorion, diin matud niya dili gyud niya malimtan ang iyang iro nga Shih Tzu nga niadtong niaging buwan lang namatay.

Alang ni Gorion nga kabahin na sa ilang pamilya ang mao niyang iro ug gani sa wala pa kini namatay hilig kaayo kining magdagan-dagan sa iyang hawla ug kahibawo usab kini kun siya niabot na ba gikan sa trabaho.

 Usa ka adlaw sa iyang pag-uli, nahibulong na lang siya kay wala na maglihok ang iyang iro gani gisuwayan pa nila kini og tabang apan wala na gyud kini mabuhi pa.

Kay giisip man ni Gorion nga kabahin sa ilang pamilya ang iyang binuhi, gipahiluna kini niya’g lubong. Gani niadtong Oktubre 27, adlaw’ng Huwebes nidagkot pa siya og kandila sa dapit kun diin niya kini gilubong sa may Doña Pepang Cemetery. “Naluoy ko adto niya, nasayangan ko kay namatay.

Additional member na unta sa akong family”, matud ni Gorion.

Si Dr. Alice Utlang, pangulo sa Department of Veterinary Medicine and Fisheries (DVMF) niingon nga ang dakbayan sa Sugbo walay sam-ang alang sa mga kahayupan sama sa iro ug uban pa.

 Apan iyang gibutyag nga ang anaa sa siyudad mao ang mass grave nga anaa sa City Pound nga maoy lubnganan sa mga iro nga ilang gi-euthanized ug matud pa dugay na ang maong mass grave.

 Isip pangulo sa DVMF gipasabot ni Utlang nga kinahanglan gyud ilubong og tarong ang kahayupan kay makamugna kini og polusyon ug adunay kagaw.

 Gihulagway niini nga mas maayo gyud nga adunay lubnganan alang sa mga hayop apan iyang gitataw nga kun ang hayop namatay sa sakit dili kini angay ilubong og bisan asa aron dili mokatag ang sakit. “Magdepende nana sa tag-iya kay naay usahay nga mga tag-iya nga close kaayo nila ilang hayop, close kaayo ilang bonding magkuha gyud sila og ilang personal nga lubnganan”, dugang ni Utlang.

Ang Cebu City Health Department sa ilang bahin niingon nga kinahanglan gyud nga ilubong og tarong ang usa ka hayop nga mamatay kay madaot kini ug daghang klase sa kagaw ang motumaw.

Matud ni Dr. Alma Corpin ang Cebu City Health Officer nga dili usab maayo nga ilubong ang kahayupan sa tugkaran apan kun dili gyud kalikayan mas maayong mogamit og chemical aron mawagtang ang baho ug aron walay kagaw nga motakod nga makadaot sa panlawas sa tawo.

“Ma-decay man siya, syempre mga rats, mga langaw, daghang klase sa bacteria nga mo-come in ug decaying na nga parts lain-laing bacteria unya daghan baya klase sa bacteria”, matud ni Dr. Corpin.

Sa ubang mga lugar adunay mga sam-ang alang sa mga hayop nga nitaliwan sab sa laing kalibutan kini aron adunay madangpan ang nagbuhi kanila sa panahon nga sila mingawon ilabi na niining nagsingabot ang Adlaw sa mga Kalag. (FREEMAN)