Presyo sa buwak mousbaw
CEBU, Philippines - Gipaabot ang pag-usbaw na usab sa presyo sa bulak nga gibaligya sa nagkadaiyang dapit dinhi sa Sugbo nunot usab sa pagsaulog sa Adlaw sa mga Kalag ug Adlaw sa mga Santos karong Nobiyembre 1 ug 2 niining tuiga.
Si Linda Lauron nga namaligya og bulak sa Dakbayan sa Sugbo miingon nga sa ordinaryong mga adlaw mokusog lamang ang halin sa pungpong sa mga bulak sa adlaw nga Biyernes sa matag semana kay daghan ang manimba sa Basilica Minore del Santo Niño ang mamalit niini. Kining maong mga buwak kinompra gikan sa mga bukirang mga barangay sa siyudad sama sa Brgy. Malubog, Babag ug Sirao.
Karong panahon sa kalagkalag ra sila mokita og dako tungod sa kadaghan sa mamalit niini. Naglakip sa gibaligya nilang mga bulak sa ordinaryong mga adlaw naglakip sa yellow chrysanthemums nga tag P50 ang pungpong (12 ka buwak) apan karon mahimo na kini nga P100 ang pongpong.
Sa samang higayon, bisan kadtong mga rosas, carnation, baby’s breath, mother’s breath ug uban pa mosaka usab ang presyo karong mga panahona apan magsugod lang kini ugmang adlawa ug kutob ra sa Nobiyembre 1 momahal ang presyo kay sa Nob.2 barato na lang aron mahurot. (BANAT NEWS)
- Latest