Rerouting sa Mandaue magsugod ugma

CEBU, Philippines - Mopatuman ang Dakbayan sa Mandaue og rerouting scheme sugod sayo sa buntag ugmang adlawa  Oktubre 31 hangtud sa tungang gabii sa Nobiyembre 2 aron dili mahasol ang mga tawong manuaw sa mga sam-ang.

Si Glenn Antigua, operations officer sa  Traffic Enforcement Agency of Mandaue (TEAM)   miingon nga magdestino usab sila og mga traffic enforcers nga mobantay sa kadalanan aron mogiya sa mga motorista.

Matud pa ni Antigua nga ang ilang mga traffic enforcers anha ibutang sa mga dalan duol sa Mandaue Municipal Cemetery, ang St. Joseph Roman Catholic Cemetery, Man Park Cemetery ug mga pribadong sam-ang sa siyudad.

Dugang pa niya nga ang  B.B. Cabahug sa may Brgy. Guizo  dili paagian sa mga PUJ gikan sa Dakbayan sa Lapu-Lapu . Ang mga sakyanan gikan didto anha moagi ubos sa Maguikay flyover  kay  sirad-an ang mga dalan paingon sa Brgy. Guizo.

Samtang si Chief Inspector Jimmy Aguisanda nga maoy deputy director for operation sa Mandaue City Police Office (MCPO) miingon nga mopakatap sila og mga polis nga nakasibilyan aron motabang sa pagbantay sa kahapsay ug kalinaw.

Dugang pa niya nga mohimo usab kini og monitoring sa maong mga dapit sa paglikay batok sa mga dautang elemento nga mohimo sa dautan nilang kalihokan sa maong adlaw nga daghang mga tawo nga magtapok sa sementeryo.

Gitataw niya nga may mga K9 Dogs usab silang gamiton nga mohimo sa pag-inspection sa mga bus nga pasaheroan sa North Bus Terminal nga diin gidagsa na usab og mga pasaherong mamauli sa probinsya. (BANAT NEWS)