Mga atraso sa US
Duha ka insidente ang gitumbok sa mga nasuhito ni Presidente Rodrigo Duterte nga nakapasamot sa iyang kahimangod sa kadagkoan sa Estados Unidos:
•Una, ang kalit nga pagbutho sa mga ahente sa Federal Bureau of Investigation sa ospital sa Davao City aron pagkuha sa Amerikanhon nga si Michael Terrence Meiring, gidudahang sakop sa Central Intelligence Agency, kansang kahon sa eksplosibo niulbo, niguba sa iyang gipuy-ang Evergreen Hotel ug niangol niya niadtong Mayo 16, 2002; ug
•Ikaduha, ang pagbalibad sa US Embassy sa aplikasyon ni Duterte sa visa tungod sa sibaw nga mga pasangil nga nahilambigit siya sa extrajudicial killings sa Davao maong napugos ang iyang hinigugmang nurse sa pagpakanselar sa iyang US work visa.
***
Sa iyang pakigpung atubangan sa Filipino community sa Beijing sa niaging semana, giusab hinuon ni Duterte ang mga detalye sa pagkabasura sa iyang aplikasyon sa US visa. Niingon siya nga nahitabo ni dihang tinun-an pa siya sa kolehiyo. Apan iyang mga suod niingon nga nabalibaran siya pagkahuman na sa insidente ni Meiring sa 2002 ug dihang sibaw na kaayo ang mga pagpamatay nga gipasangil ngadto sa Davao Death Squad.
Matod sa mga nahibawo sa insidente pakapin ug pasiaw na lang ni Duterte ang giingong panagana sa US consul nga nag-interview niya nga magminyo ug mopuyo siya sa Estados Unidos ug di na mobalik sa Pilipinas.
***
Duha sab ang gitumbok sa mga suod ni Duterte nga unang nakapugas sa binhi sa pagtuo ni Duterte sa dakong atraso sa mga Amerikanhon sa Mindanao ug sa katawhang Pilipinhon:
•Ang iyang Maranaw nga lola, ang inahan sa iyang inahang si Soledad, nihulagway sa batan-ong Duterte sa kabangis sa Amerikanhong mga sundawo sa pagpatay sa lumad nga mga molupyo sa Mindanao; ug
•Si Jose Ma. Sison, ang nagtukod sa Communist Party of the Philippines, nga magtutudlo ni Duterte sa Political Science sa Lyceum University, ang nipasabot niya sa kapintas sa imperyalismo ug sa pakigkonsabo sa mga Amerikanhon sa mga politiko ug mga negosyante sa Manila pagdaugdaog sa mga Pilipinhon.
***
Mga paryente ni Duterte nga tua na magpuyo sa Estados Unidos ang labing kusganong nisukmat niya human nideklarar nga putlon na niya ang relasyon sa Pilipinas ug Estados Unidos sa mga natad sa ekonomiya ug sa seguridad.
Mahimong ang ilang pangasaba ug ang panagana sa mga sakop sa iyang gabinete maoy nakaaghat ni Duterte sa pag-usab sa makausa pa sa iyang baruganan. Niingon na sab nga di lang magpabilin ang diplomatikanhong relasyon sa duha ka nasud, mangonsulta pa siya sa kapolisan ug sa militar kon angay bang ipadayon ang lapad ug dugay nang pagtinabangay sa mga sundawo ug kapolisan sa Pilipinas ug Estados Unidos.
- Latest
