Patay’ng lawas sa 16 anyos nabangalan
CEBU, Philippines - Nabangalan sa usa ka mananagat nga nag-utaw-utaw sa kadagatan sa may Sitio Lawis Looc sa Brgy. Poblacion kagahapon sa alas 7 sa buntag ang patay’ng lawas sa 16 anyos nga tinun-an sa Grade 10 sa Argao National High School nga nilayat sa pier niadtong Miyerkules.
Nabangalan ni Rolando Geagonia, ang patay’ng lawas sa batan-on dihang kini nanagat.
Nasayran nga ang maong batan-on gituohang nagpakamatay pinaagi sa paglayat sa pantalan gumikan sa giingong dakung problema.
Matud ni PO3 Benjamin Gerosaga, mopahigayon pa sila og lawom nga imbestigasyon subay sa maong insidente diin adunay gibilin nga suicide note ang dalagita.
Si Poblacion Brgy. Captain Parex Lanutan, mapasalamaton sa mga tawo nga nitabang sa retrieval operation sa maong batan-on.
Nagbaha sab sa social media ang pagpaabot sa ilang pahasubo ngadto sa pamilya sa maong batan-on ug malaumon sila nga magmalinawon na kini sa hingpit. (BANAT NEWS)
- Latest
