PENRO nakakolekta og P14M

CEBU, Philippines - Ang Provincial Environment and Natural Resources Office (PENRO) nakakolekta og sobra sa P14 milyones nga multa gikan sa mga truck operator nga nagkarga og bas ug graba nga walay mga permit, sukad niadtong buwan sa Enero hangtud sa Septiyembre niining tuiga.

Ang maong mga truck operator nakalapas sa ordinansa kay kasagaran kanila walay sticker sa Permit to Operate (PTO) ug walay delivery receipt.

Ang maong mga nakalapas gipabayad og multa nga P10 mil ngadto sa P10,800 apan dunay uban nga napasakaan og kaso ngadto sa Provincial Legal Office.

Sa sayo pa, ang officer-in-charge sa PENRO nga si Baltazar Tribunalo Jr. gipasanginlan nga nagpahigayon og kurapsiyon ug ang mga personnel niini. Apan ang maong pasangil gihimakak ni Tribunalo ug ang usa sa tulo ka kawani sa PENRO nga nalambigit sa pagpangilkil, nataktak sa trabaho ug ang duha gipaubos karon sa imbestigasyon. (BANAT NEWS)