Makina sa pump boat ug fish stalls gipanghatag

CEBU, Philippines - Napulo ka mga makina sa sakayang pandagat o pumpboat ang gipanghatag kagahapon ngadto sa mga mananagat sa dakbayan sa Mandaue.

Lakip nga gipanghatag mao ang 4 ka fish stalls nga nagkantidad og tag P15 mil matag usa ngadto sa mga manindahay og isda sa Mandaue City Public Market.

Ang maong pagpanghatag, proyekto sa Bureau of Fisheries and Aquatic Resources (BFAR-7) ug sa City Agriculturist Office sa nahisgutang siyudad.

Tulo ka mga fisherfolks association sa Mandaue ang nakadawat sa napulo ka motor engines nga nagkantidad og tag P3,880 matag usa, kini mao ang Laboganon Fisherfolks Association, Looc Fishermen’s Association ug Paknaan Fishermen’s Association. Samtang ang mga nakadawat sa fish stalls mao ang mga manindahay nga silang Ranulfa Ceniza, Eufemia Inoc, Sally Igot ug Sweethie Avenido.

Gipadayag ni Ana Belga sa BFAR-7 nga angayang ampingan sa mga beneficiaries ang mga fish stall kay ginama kini sa stainless ug bacteria free mao nga limpyo kanunay ang ilang mga tindang isda. Iyang giawhag ang kagamhanan sa Mandaue nga mohimo’g susama nga proyekto aron mas daghan pa ang mahatagan.

Si Konsehal Elstone Dabon ang chairman sa Committee on Agriculture nagkanayon nga mas maayong aduna gyuy asosasyon ang mga manindahay aron daling matabangan. Dugang sa konsehal nga maninguha ang siyudad nga matabangan gyud ang mga mananagat og manindahay. (BANAT NEWS)