Ang utlanan sa kinutoban

Walay usa nato ang nasayod kun unsa kabug-at ang mga pagsulay nga moabot sa atong kinabuhi. Ang mahimo lang nato mao ang paugnaton nga mabansay ang kaugalingon sa pagdawat sa bisan unsang hagit sa kinabuhi bisan pa kini makaugtas. Mas labi pa natong pangitaon pangandoyon nga di mahadlok sa pagsuong sa mga dinagkong problema sa kinabuhi.

Di kita motalaw kinahanglan pakigbisogan kay wala kitay katakos sa paglihay sa mga pagsulay. Maluya ka gyud kun igo lang nimo lukduon nga dili alsahon aron unta matimbang ang gibug-aton hangtud maanad na sa kagaan sa pagdaug. Dinhi molig-on sa palas-anon ang kaugalingon nga dili na balehon ang unsa man kabug-at pa sa pagsulay nga sagubangon.

Kun buot kita makaseguro nga makaabot sa utlanan nga dawaton ang ganti sa pagdaug makamao sab kita molugway sa kinutuban sa atong pagpailob. Di maputong magmabugnawon sa panghunahuna aron kapundo'g kusog sa paglahutay. Magpasensiya sa mga nakaugtas nga mapinasayluon.

Kun sa pakigbisog maoy naangkon ang kapildihan ayaw kaluya padayon kay unang hugna pa lang kini timailhan nga duol ka na sa utlanan sa mga nagmadaugong wala kahubsi sa kinutuban sa paglaum batok sa paglaum. Niini way kabutangan ang kalipay nga dawaton ang ganti nga bulawan.

Ampingan ning ipasundayag nga mahimong panig-ingnan sa uban nga makaagni'g kadasig nga masunod ang lakang sa mga nagmadaugon. Di sab kalimtang yukboan ang  kahitas-an nga naghatag kusog aron kita molampos.