2-0 laraw sa Lancers
CEBU, Philippines - Tinguha sa University of the Visayas Green Lancers ang makaposte og 2-0 nga bintaha apan angayan silang mangandam sa usa ka dakong gubat batok sa University of San Carlos Warriors sa Game 2 sa best-of-five 16th Cebu Schools Athletic Foundation, Inc. collegiate basketball finals karong adlawa diha sa Cebu Coliseum.
Human sa 76-60 nilang demolisyon sa Warriors niadtong Sabado, ang Lancers ni coach Gary Cortes mipaduol sa ilang misyon nga molangkat sa korona nga katapusan nilang natilawan niadto pang 2013.
Ang Lancers nagsandig sa nagkayong opensiba sa final half aron pagpatikangkang sa Warriors ug pagtabla sa ilang head-to-head record karong season sa tagurha ka duwa.
Human magtabla sa iskor nga 47-47, gilimitahan sa Lancers ang Warriors ngadto lamang sa dos puntos sa katapusang dos minutos sa ikatulong kuwarter ug kuwatro puntos sa nag-unang siyete minutos sa katapusang hunat sa duwa. Sa maong higayon, ang Lancers mipabuto og 25-6 nga bomba aron pagbuak sa duwa, 72-53.
"It was a good thing that we limited the production of their shooters in the second half," matud pa ni Cortes. "For the coming games, I always told my boys to play one game at a time and play each game as if it is their last. I'm sure coach Rommel (Rasmo) will do some adjuments."
Mapaubsanon hinuong miangkon si Rasmo nga nawani gyud sila sa Lancers ilabi na sa katapusang tunga sa duwa diin sila mingkupos.
"They really outplayed us in that game, especially in the second half. As for Game 2, we will come out with a lot of energy just like what we have been doing before," pasalig pa ni Rasmo.
Aron sila makaresbak, kinahanglan nga sila si Ian Tagapan, Victor Rabat ug Kevin Oledo mosalida. Ang ilang import nga si Scoty Ntumba angayan sab nga mowadwad ingon man sila si Condrad Catapusan, Clint Muñez, Malcolm Tan ug Gio Laguyo.
Sa habig sa Lancers, ilang lauman sila si Jan Monic Soliva, Rey Suerte, Alfred Codilla ug Josue Segumpan. Makasandig sab sila nilang Bassieru Sackor, Jason Balabag, Michael Macion, Jerome Napao ug Sheldon Gahi. EBV (BANAT NEWS)
- Latest