Mapua optimistiko sa back-to-back title
MANILA, Philippines – Optimistiko ang Mapua na masungkit ang back-to-back titles dahil mananatiling solido ang kanilang koponan sa susunod na edisyon ng NCAA juniors basketball tournament.
Nakasakay pa ang Red Robins sa alapaap matapos kubrahin ang kampeonato sa Season 92 kung saan hinubaran nito ng korona ang San Beda sa bendisyon ng 84-67 pananaig sa rubber match ng best-of-three finals.
Ngayon pa lang ay nakatuon na ang atensiyon ni Mapua coach Randy Alcantara sa pagbalangkas ng plano para sa tangkang ikalawang sunod na kampeonato.
“We’re only losing three players this year so we’ll have a good chance of repeating next year,” ani Alcantara.
Tinukoy nito sina Sherwin Concepcion, Jasper Salenga at Finals MVP Bryan Semudio na mga mawawala sa lineup ngunit may isang taon pa upang makagawa ng paraan para punuan ang mababakanteng puwesto ng tatlo.
Dahil dito, maiiwan ang pasanin kina Brian Lacap, Clint Escamis, Juaquin Garcia, Warren Bonifacio, Romuel Junsay at Will Gozum na siyang sasandalan ng Red Robins.
- Latest
