Bana nakigtipon og laing babaye

Dear Atty. Divine,

Ang akong bana nakigtipon na og laing babaye duha ka tuig na ang nakalabay. Gani may anak na sila. Ako ug ang among tulo ka anak nga pulos pa nagtungha, iyang gibiyaan ug gisuportahan lang kami niya para sa among pagkaon ug sa tuition fee sa mga bata. Dunay negosyo ang akong bana ug may napalit mi nga duha ka ektareyang luna kaniadto didto sa probinsya. Akong nahibaw-an nga ang maong luna gipatukuran karon og balay sa akong bana ug sa iyang babaye. Gisulong nako ang akong bana kay gusto ko nga kuhaon ang property alang sa among mga anak apan wa siya mosugot ug iya pa gani ko nga gibun-og. Unsay angayan nako nga buhaton? Modangop unta ko sa korte apan wa ko’y kuwarta. Asa man ko modangop? —Toni

Dear Toni,

Kun gusto ka nga mobarog sa imong katungod isip legal nga asawa, kinahanglan gyud ka nga modangop sa korte. Duha ka kaso ang mahimo nimong ipasaka sa imong bana. Una kanang iyang pagpangabit mahimo ni siyang mapasakaan og kasong Concubinage ug sigurado gyud na nga makombikto kun aduna kay ebidensya nga nagtipon sila sa ilang babaye, ilabi na kun makuha nimo ang birth certificate sa ilang anak. Apil sa imong pasakaan og kaso mao ang iyang babaye. Laing kaso nga imong mapasaka batok sa imong bana mao ang kalapasan sa RA 9262, kon Anti-Violence Against Women and Their Children’s Act. Kanang iyang gihimong physical abuse and psychological violence kalapasan kana sa maong balaod ug sigurado sab siyang matanggong niini kun mapamatud-an.

Ang una nimo nga buhaton mao ang pagpa-blotter sa iyang pagpamun-og kanimo ug sa iyang pagtipon og laing babaye. Magpatabang ka sa police alang sa pagpasaka og kaso batok sa imong bana ug ang Prosecutor’s Office na ang molaban sa imong kaso, busa mahimo ra nga wa kay abogado kay ikaw man ang reklamante. –Atty Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.