Pocari, BaliPure nais makisalo sa liderato sa Shakey’s V-League
MANILA, Philippines - Pakay ng Open Conference titlist Pocari Sweat at BaliPure na makisalo sa liderato sa kanilang pagtutuos ngayong hapon sa Shakey’s V-League Season 13 Reinforced Conference sa Philsports Arena sa Pasig City.
Magkukrus ang landas ng Lady Warriors at Water Defenders sa alas-4 habang maghaharap naman sa ikalawang laro ang Bureau of Customs at Philippine Air Force sa alas-6 ng gabi.
Magkasama sa ikalawang puwesto ang Pocari at BaliPure hawak ang parehong 4-1 marka sa ilalim ng nangungunang University of Santo Tomas na may 5-1 baraha.
Ang Customs naman ay nasa ikaapat bitbit ang 4-2 rekord.
Wala sa isip ng Pocari ang puwestuhan sa Final Four dahil nais lamang nitong magkaroon ng magandang momento bago pumasok sa susunod na yugto.
“We just want to try to win as many games as we can going to the semis and maybe gain some momentum,” pahayag ni Pocari coach Rommel Abella.
Tinalo ng Lady Warriors ang Water Defenders sa semifinals ng Open Conference bago gapiin ang Air Force Jet Spikers sa finals.
Ngunit sa pagkakataong ito, mamanduhan nina American imports Breanna Lee at Kay Kacsits ang Pocari kasama sina Myla Pablo, Michele Gumabao, Desiree Dadang at setter Iris Tolenada.
Ang BaliPure naman ay sasandal kina reinforcements Katherine Morrell at Kaylee Manns katuwang sina Charo Soriano, Dzi Gervacio, Ella De Jesus, Denden Lazaro at Mae Tajima.
Sa kabilang banda, kukuha ng lakas ang Transformers kina Alyssa Valdez at Thai imports Kanjana Kuthaisong at Natthanicha Jaisaen.
Sa Spikers’ Turf Season 2 Third Conference, maghaharap ang Instituto Estetico Manila at Philippine Army sa alas-10:30 ng umaga kasunod ang duwelo ng Cignal at 100 Plus sa alas-12:30. (CCo)
- Latest
