Nagkinahanglan og tabang

Dili tanang nanaway ni Presidente Rodrigo Duterte ang nahiagom sa makalilisang niyang balikas ug insulto. Taliwa sa inadlaw niyang pakig-away sa Estados Unidos, ni US President Barack Obama, sa United Nations, sa European Union ug ni Senador Leila de Lima nga karong bag-o mao nay iyang gibasol sa pagsugod sa hingpit na nga pagtumaw sa narcopolitics sa Pilipinas, may laing tulo sa mga nanaway ni Duterte nga wala niya hilabti.

Wa niya tubaga sila si Bise Presidente Leni Robredo, nga nagsige og pahinumdom ni Duterte pagmatngon sa iyang sinultihan, ug kanhi Presidente Fidel Ramos, nga nideklarar nga dakong pildero ang Pilipinas sa unang 100 ka adlaw sa pamunoang Duterte. Nitubag si Duterte nga katungod sa aktres nga si Agot Isidro ang pagtawag niya og psychopath.

* * *

Mahimo nga ang kakalma ug kamabinantayon sa sinultihan ni Robredo ug ang kanunay nilang panag-abot sa mga tigum sa gabinete sa Malakanyang maoy nakaaghat ni Duterte sa pagdawat nga ang nagkasungi nilang baruganan sa pipila ka isyu dili makaapektar sa ilang pagdumala sa nasud isip duha sa labing taas nga mga opisyal sa gobiyerno.

Mahimo nga ang dako niyang utang kabubut-on ni Ramos, nga iyang gipasidunggan nga maoy nagkumbinser niya pagdagan, maoy nakapahilom niya sa pagdason ni Ramos sa mga pagsaway sa iyang mga kaatbang sa iyang pagpamalikas ug pagpangaway sa tanang nisukwahi sa iyang baruganan. Mahimong nakahukom sab nga wa siya’y makuha kun makig-away sa matahom nga artista.

* * *

Dili sama og kapalaran ang iyang higala nga retiradong arsobispo sa Davao nga si Fernando Capalla kinsa igo lang niawhag niya sa pagpaminaw sa ubang mga tawo aron nga dili hingpit nga masaag ang iyang administrasyon.

Gawas nga gibalikas ni Duterte si Capalla ug ang ubang kaparian sa Simbahang Katoliko, gipasanginlan pa gyud nga sama niya dunay kabit. Wa mohatag og dugang detalye, lahi sa kaabunda sa iyang igsusulti batok nilang de Lima, Obama ug sa US, UN ug EU. Klaro hinuong nasakitan sa paniid sa haligi sa simbahan nga nakasaksi sa kapin sa duha ka dekada niyang pagdumala sa Davao.

* * *

Unsa man diay sulti ni Capalla?

“Paminaw. Paminaw. Paminaw. Digong, ang Ginoo naghatag kanato og duha ka dalunggan, usa ra’y baba. Pasabot nga kinahanglang mas daghan og paminaw kay sa sulti. Apan bali ang nahitabo, mao nga naproblema ang nasud karon.

“Ang mga dunggan importante. Dili ta maminaw sa duha lang ka dunggan, kun dili, sa ikatulong dunggan o sa atong kasingkasing. Nabalaka ko niya isip higala. Akong tan-aw, may problema siya. Kinahanglang ato siyang tabangan.

Nagpadayon siya pagguba sa iyang kaugalingon. Ambot nahibawo ba siya niini. Unsaon nato pagtabang niya? Mao na ang pangutana. Kun maminaw pa lang siya sa ubang tawo, kun dili pa lang magsige og estorya, kun makighigala inay makig-away, si Duterte mahimong labing bantugang presidente sa Pilipinas.”

([email protected])