Managsuong pusher nanglangoy sa dagat

CEBU, Philippines -  Milampus gayod sa pag-eskapo ang managsuong gikatahapang  drug pushers nga target sa buy-bust operation diha sa Sitio Patag, Brgy. Argawanon, Lungsod sa San Remegio human nila gipamusil ang mga polis.

Ang mga nakaeskapo mao sila si Ruben Precilla Dabocol ug Rico Precilla Dabocol pulos nagpuyo sa maong dapit, ang duha nakaikyas pinaagi sa pagsawom sa dagat. Si Senior Police Officer 2 Joe Johnaskie  Inot sa San Remegio Police Station nagkanayon nga bisan nakaeskapo ang duha, nadakpan pud nila ang unom ka mga tawo nga gidudahang nagsuyop og shabu sa maong lugar.

Napunitan usab sa mga polis ang usa ka .357 Magnum nga dunay mga bala nga gituohang natagak sa pagdinaganay sa mga suspek.

Ang mga nadakpan mao sila si Roselo Ando Metante, 40, Aldwin Lipon Alboro, 44, Archie Rollo Servilla, 37, Dave Ramirez Masuwangat, 21, ug Nicanor Romagon Almerio, 31.

Sumala pa nga gipalitan unta og P200 nga shabu ang magsuon apan nakamatikod dayon sila maong dali silang nanagan ug namusil sa mga polis ug nangambak sa dagat ug nanglangoy palayo. Pito ka mga paketeng shabu ug drug paraphernalia ang nasakmit. (BANAT NEWS)