Sugbuanon sa Libya

Si Winston Fernandez usa sa mga Sugbuanong trabahante sa Libya nga nakagawas na sa nagubot nga nasud. Apan di tungod sa paningkamot sa Department of Foreign Affairs (DFA) ug Overseas Workers Welfare Administration (OWWA). Kon dili tungod sa tabang sa ilang employer, ang SNC-Lavalin, nga nagbase sa Canada ug maoy nakadaog sa higanteng mga proyekto pagtukod sa tugpahanan, prisohan sa Libya ug Great Man Made River nga gipahimo ni Moammar Ghaddafi.

Apan si Winston, uban sa laing 20 ka Sugbuanon ug labing menos 200 ka Pinoy di pang kapauli sa Pilipinas. Salamat sa DFA ug OWWA. Kansang mga opisyal wa pa gyung kapakita nila bisan upat ka adlaw na silang natanggong sa Alexandria, Egypt. Ang dapit nga ilang gibakwetan paglingkawas sa kaguliyang sa Libya.

* * *

Dihang niulbo ang kaguliyang sa Libya, gipabakwet dayon sa SNC-Lavalin silang Winston ug kaubanan ngadto sa Benghazi, ang ikaduhang labing dakong dakbayan sa Libya nga nailog na sa mga demonstrador gikan sa diktadura ni Ghaddafi. Upat ka adlaw silang nagpuyo duol sa Benina International Airport nga ang SNC-Lavalin ra say nagtukod.

Hangtod nga nangabot ang buses nga gikontrata sa ilang employer niadtong Pebrero 21. 5,000 silang nagpaabot busa di masud sa lima ra ka buses. Maong gi-raffle sa kadagkoan sa kompaniya ang limitadong mga lingkoranan sa buses. Nasuwertehan si Winston kay nahulbotan niyang usa sa mga lingkoranan sa ikaupat nga bus.

* * *

Upat ka adlaw ang ilang biyahe paingon sa Alexandria, diin gipahimutang sila sa SNC-Lavalin sa mahalon kaayo nga Radission Blu Hotel. Wa silay reklamo sa pagkaon apan kuwang ang ilang tubig. labaw sa tanan, way naghikay sa ilang travel documents ug way seguro kanus-a sila makapauli dinhi.

Kay wa man gyuy nagpakita nga taga DFA ni OWWA, ang SNC-Lavalin nipasalig nga motabang pag-andam sa ilang visa ug mga tiket sa ayroplano. Apan hangtod sa among panagsulti ni Winston sa Skype gahapon sa hapon wa silay nadawat nga notisya gikan sa employer. Ni sa ilang placement agency.

* * *

Ang igsuon ni Winston nga si Josettes Fernandez hagbay rang nagpalaban sa lokal nga mga buhatan sa DFA ug OWWA. Abunda ang mga pasalig sa tabang nga iyang nadawat. Apan hangtod sa akong pagsuwat ini, wa pa gyuy nakatultol nilang Winston ug kaubanan.

Di lisod tultulon ang Alexandria, ang ikaduhang labing dakong dakbayan sa Egypt. Kon wa pang kataak sa Alexandria ang taga DFA ug OWWA, unsa na kaha sa mas suok nga mga dapit sa Egypt, Tunisia ug labi na gyud sa sud sa Libya? Kon wa pa maatiman ang gatosan ka mga Sugbuanon ug mga Pilipinhon kuyog ni Winston, unsa na kaha ang mas gagmayng pundok sa OFWs nga nagkatibuwaag sa Libya ug ubang kanasuran?

Email:   [email protected]