Ultimatum ni Glo

Niang ikaduhang bahin sa e-mail ni Vicente "Enteng" Romano III, ang orihinal nga e-Mandirigma, ang nagtukod sa eLagda.com nga maoy responsable sa pagpalagpot ni kanhi presidente Joseph Estrada pinaagi sa e-mails, fax ug text messaging, nga nipadayag og kasubo sa kahilom sa mga sektor nga nisuporta sa Edsa 1 ug 2 parte sa kontrobersiyal nga audio recording sa giingong panag-istorya sa telepono nilang Presidente Gloria Macapagal-Arroyo ug kanhi Comelec Commissioner Virgilio Garcillano:

"Di ta mahimong magpabiling hilom atubangan ning seryusong mga pasangil, bisan pa kon nagtoo ta nga ang alternatibo mas ngil-ad pa, bisan pa kon nakumbinser ta nga si Gloria makahimo pag maayong mga butang para sa nasud. Ang pagpakahilom mao ang pagtugot sa binuang, basta mohaom lang sa atong mga interes. Kon mahitabo ni, wa tay kalainan sa tradisyonal nga mga politiko. Ug angay natong isurender ang bisan unsang pangangkon sa katarung.

"Nagtoo ko nga panahon na para sa nagpakabana nga mga grupo ang pagbarug ug pakigbisog para sa kaligdong. Mahimong di pa karon ang panahon pag-awhag ni Gloria sa pag-resign. Pero nagtoo ko nga panahon na aron awhagon siya sa pagbuak sa iyang kahilom ug pagtug-an nato sa kamatuoran mahitungod sa tapes.

"Para ninyo nga paminawon pang Gloria, mangilaba ko nga gamiton ang inyong influencia aron pag-awhag niya pag-atubang sa isyu-pagpanghimakak o pag-angkon iya ba ang tingog sa tapes, ug matinud-anong pagpasabot sa mga sirkumstansiya sa tapes. Ug palihug kumbinsiha siya sa paghimo ini karon, di unya pa-sa di pa ang bawod sa mga pagduda mopugos niya pagtingog. Ang katawhan mas interesadong mahibawo sa kamatuoran sa unod sa tapes kay sa pag-ila kinsay responsable sa ilegal nga wiretapping.

"Kanatong tanan, mohangyo ko nga ato nang ideklarar ang atong mga baruganan ning maong isyu-sa kadalanan, sa Internet ug sa ubang media. Magkuptanay ta sa atong mga kamot sa pagdemanda nga si Gloria motingog na ug motug-an nato sa kamatuoran KARON DAYON!

* * *

Nakaseguro kong si Enteng wa mag-inusara. Daghan pang mga indibiduwal ug mga grupo nga hingpit nga nagsuporta ni Presidente Arroyo nga nagduda na sa padayon niyang pagpakahilom. Ang kapakyas sa politikanhong oposisyon pagkumbinser sa kinabag-an nga panahong nang palagputon si Presidente nagmatuod nga naghuwat pang kinabag-an nga ang presidente manalipod sa iyang kaugalingon.

Pero di niya kapanalipdan ang iyang kaugalingon pinaagi sa pagpakahilom. Sa pagpakaaron-ingnon nga magpadayon sa iyang trabaho nga mora lang way nahitabo. Ang mga panghitabo sa mosunod nga mga adlaw-nga posibleng maglakip sa dugang mga alyado sa administrasyon nga modason sa maniobra sa eleksiyon nga nahisgutan sa recording-mohimong imposible sa pagpadayon ni Presidente Arroyo pagpa-gorya-gorya sa pagpangu sa nasud.

Kon iya nang paabuton una motingog, mahimong uwahi nang tanan.

* * *

Email: [email protected]