GSIS connection

Karon, naklaro na nga di diay bag-o ang ebidensiya nga gihuptan ni Kongresista Clavel Asas-Martinez. Ang iyang audio recording kabahin ra sa recording nga giwarawara ni Press Secretary Ignacio Bunye sa Malakanyang. Nadunggan na ni sa mga Sugbuanon. Ang transcript ila na sang nabasahan.

Gawas nga bahaw na, sayop sab ang pangangkon ni Martinez nga ang recording nagmatuod nga gitikas ang eleksiyon sa Sugbo. Kay ang bugtong gihisgutan sa panag-istorya sa wa mailhing lalaki (nga segun ni Martinez si GSIS President ug General Manager Winston Garcia; ug segun ni kanhi senador John Osmeña kon di kang Garcia, tingog to ni Pagcor Chairman Ephraim Genuino) ug ni kanhi Comelec Commissioner Virgilio Garcillano mao ra man ang pag-apura sa proklamasyon ni Gobernador Gwen Garcia.

* * *

Pero dunay bag-ong kasayuran nga gibisto si Martinez atol sa iyang pagbisita sa ABS-CBN News Channel sa niaging gabii. Matod niya ang audio recording nakaaghat niya pagsubay pagbalik sa giingon niyang kuwestiyonableng mga sirkumstansiya sa proklamasyon ni Garcia.

Ang ilang nadiskubrehan? Si Garcillano ang nagluwat sa resolusyon nga nagtugot sa proklamasyon ni Gwen Garcia pila ka oras human napupos ang termino sa iyang amahan nga si Pablo. Matod ni Martinez ang resolusyon sa Comelec nga maoy gibasehan sa proklamasyon gi-fax gikan sa upisina ni Garcillano ngadto sa upisina sa GSIS sa Sugbo.

May sukaranan si Martinez nga manghimalingka tungod sa eksplosibong koneksiyon ni Garcillano ug sa mga Garcia nga ilang nasakpan. Kay nganong sa kadaghang telepono sa Comelec sa Sugbo, ug sa kasibaw sa pagduda nga may koneksiyon ang mga Garcia sa Comelec, ang GSIS man gyoy gipadad-an ni Garcillano sa iyang resolusyon?

* * *

Di angayng maghuramentado ang Sugbuanong mga lider nga nahadlok kaayong maduhig ang Sugbo sa eskandalo sa audio recording. Nasubli na nako ang tibuok tulo ka oras nga recording ug ang kinatibuk-ang transcript ug way bisan usa ka istorya nga naghisgot, bisan pasumbingay na lang, sa tikas sa eleksiyon sa Sugbo.

Di sab makiangayon nga mag-una-una sila pagtulisok sa mga Sugbuanon nga maoy gipasanginlan ug gipakauwawan. Si bisan kinsang beteranong politiko motug-an nimo nga di ang katawhan maoy manikas-sila hinuoy kasagarang mga biktima sa tikas.

* * *

Ang mga kasayuran nga sama sa gisangyaw ni Martinez maoy makapasamot sa kaapiki sa kahimtang ni Presidente Gloria Macapagal-Arroyo. Mosamot ang kakatoohan sa recording kay nitakdo sa mga panghitabo nga nakapasamot sa kaklaro sa kalapad sa maniobra sa niaging eleksiyon.

Ug di na magsilbi ang pasangil sa mga torotot sa presidente nga ang recording minao-mao lang sa pipila ka tawo nga nagtinguha pagpukan sa administrasyon. Ang mga alyado sa presidente samang Martinez nagduda na ron nga posibleng giapil silag luto aron lang pagseguro sa kadaogan sa presidente.

* * *

Email: [email protected]