Kalamposan sa Grand Halad
Nalilian namo ang talagsaon nga kalamposan sa labing uwahi nga hugna sa Grand Halad sa Kapamilya mao ang kabaga na sa mga naglinya dihang giablihan namo ang ganghaan sa Cebu Technological University (CTU) Main Campus sa alas-5 sa kadlawon gahapon ug ang kahapsay sa ilang pagsud ug pagsugod sa linya sa mga pangalagad nga gitinguha nila nga pahimuslan.
Igo g'yud nga napahimutang ang unang hugna sa katawhan, nagsugod ang Santos nga Misa ni Msgr. Ruben Labajo sud sa Kasadya Gym nga mao'y gihimoan sa libreng konsultasyon ug pag-apud-apod sa libreng mga tambal.
***
Sa iyang wali, nisugilon si Msgr. Labajo sa talagsaong sugilanon sa mga ginikanan nga nisakripisyo pagkaon og panit sa mga lagutmon aron nga kapahimuslan sa ilang mga anak ang kalamian sa mga unod. Apan ang inahan ug amahan ang labing nahimsog kay ang panit mao'y nahimutangan sa labing bantok nga sustansiya.
Iyang gipasidunggan ang talagsaon nga sakripisyo sa tanan nga nitabang sa labing nagkinahanglan pinaagi sa Grand Halad sa Kapamilya. Kay ila sab ang labing abunda nga grasya sa Labaw'ng Makagagahom nga nakakita sa kalunsay sa ilang kamanggihatagon.
***
Niduaw sa Grand Halad sa Kapamilya gahapon silang Cebu City Mayor Tommy Osmeña ug ang iyang kapikas nga si Konsehal Margot Osmeña. Sama namo, nakugang sab sila sa kabaga sa nanambong nga nipasiaw ang mayor nga sa pagsud niya sa CTU gipakaingon niya nga nalugwayan ang dakong rally sa PDP-Laban sa silingang Plaza Independencia niadtong Biyernes.
Nitanyag si Mayor Osmeña og tabang aron paghimo nga mas subsob sa Grand Halad kay sa naandan nga kaduha matag tuig. Aktibo na siya nga nitabang sa Grand Halad pinaagi sa Long Life Medical Assistance Program.
***
Sa pagsuwat nako ini dayong tapos sa Grand Halad, nakaihap na mi og kapin sa 15,000 nga nakapahimus sa nagkalainlain nga mga pangalagad sa gatosan ka indibiduwal ug institusyon. Mas daghan ang nakapahimus sa mas daghang pangalagad kon itandi sa nangagi nga mga Grand Halad.
Tingali tungod sa maayong kahimtang sa panahon human sa hulga sa low pressure area nga nahimong bagyong Tino nga nipabaha sa Metro Cebu sa niaging semana. O tingali kay gamhanan g'yud ang gugma sa paghinatagay.
- Latest
