Minilyon ka pesos nga halad
Samtang ang kinabag-an sa dul-an sa 20,000 nga moapil sa Grand Halad sa Kapamilya tibuok adlaw karong Sabado, Nobyembre 18, sa main campus sa Cebu Technological University (CTU) makapahimus sa labing dakong piyesta sa libreng mga pangalagad, nia ang mga boluntaryo nga moatiman nila:
•Kapin sa gatos ka doktor nga naglakip sa mga dentista ug mga espesyalist sa mata, ug veterinarians;
•Kapin sa gatos ka nurses, pharmacists, radiology technicians, medical technologists;
•Kapin sa gatos ka abogado ug mga tinun-an sa abogasiya; ug
•Kapin sa gatos ka magtutudlo, IT technicians, polis, sundawo, masahista, barbero, manikyurista, ug security officers.
***
Saw-an nila'ng dul-an sa milyon ka pesos nga mga tambal sa ubo, sip-on, hilanat, high blood pressure, arthritis, ug diabetes, ug mga bitamina, mga maibtan og ngipon ug mga iro ug iring.
Mapahimuslan sang dul-an sa milyon ka pesos nga balor sa kapin sa 3,000 ka laboratory services nga naglakip sa chest x-ray, urinalysis, total cholesterol, fasting ug random blood sugar, complete blood count, ug blood typing.
***
Malibre ang kapin sa milyon ka pesos nga balor sa konsultasyon sa mga doktor sa kapin sa 2,000 ka pasyente; kapin sa milyon ka pesos nga balor sa pag-ibot sa mga ngipon sa dul-an libo ka pasyente; ug dul-an sa tunga sa milyon ka pesos nga balor sa paghiling sa mata ug antipara sa dul-an libo ka pasyente.
Malibre sa'ng kapin sa milyon ka pesos nga balor sa kapon, bakuna, purga, ug tupi sa gatosan ka iro ug iring; ug kapin sa P100,000 nga balor sa tupi, manicure, pedicure, reflexology, ug masahe sa dul-an libo ka kustomer.
***
Ihalad ang kapin sa P300,000 nga balor sa pag-ayo sa gatosan ka cell phones, laptops, desktops ug tablets; dul-an sa P100,000 nga balor sa konsultasyon ug notaryo sa kapin sa gatos ka kliyente sa mga abogado; ug kapin sa P300,000 nga balor sa libreng pagkaon ug tubig.
Ihalad sa'ng kapin sa milyon ka pesos nga balor sa pagtudlo sa mga panginabuhi, teknikal nga tambag sa mga inhinyero, abangan sa mga trak ug mga tolda ug seguridad gikan sa mga polis, sundawo ug boluntaryo.
- Latest
