Hadlok sa anino
Kon makakita ka og mga anino bisan asa lingi sa palibot, mahimong tinuod g'yud kang gihamok. Apan mahimo sab nga samok lang ang imong panghunahuna. Mahimo gani nga ikaw ra say nagmugna sa mga mangtas aron pagmatuod sa imong kaisog ug talagsaon nga katakos sa pagpanagang sa tanang posibleng mga hulga.
Kon makabatyag ka og hulga bisan sa labing inosente nga kasikas, mahimong may mga nag-atang g'yud pagbanhig sa imong agianan. Apan mahimo sab nga gilubat-lubatan lang. Mahimo gani nga natukbil lang ang tanyag kay way klaro nga padulngan.
***
Kon ikaw ra g'yud ang sakto, bisan sa nagbuntaog nga mga ebidensiya nga sayop ang imong pagtuo, nagbuntaog nga garbo mao ang labing dako nga hulga nimo. Kon mamugos pagpadayon sa nasugdan, bisan napamatud-an na ang nangalisbo nga kasaypanan, nahulga ka sa kamatuoran.
Kon magsige lang og pangita og kalutsan, bisan klaro na nga ang mga saad di matuman, ang imong kalimbongan mao ang angay nga kahadlokan. Kon di mahutdan og laing matunglo, bisan ikaw ang nakahimo sa bulilyaso, angay'ng malisang sa kakuwang sa kaligdong nimo.
***
Kon himuon ang tanang maniobra pagmatuod sa tibuok kalibotan nga ikaw ang labing utokan, mahimo nga ang kalidad sa imong pangisip mao'y labing lumoy nga kahuyangan. Kon magsige og pangugat nga ikaw ang labing maayong laki, mahimong nabalaka na sa hingpit nga kaapiki.
Kon manghagit na ni bisan kinsa, pinasikad lang sa sayop nga kasayuran ug mga intriga, nahasol na sa kahuyang sa imong suporta. Kon manghudlat na ni bisan kinsa, sa paggamit sa tanang gihuptan nga puwersa, kahuyang ug kakuwang sa lahutay ang posibleng makapalukapa.
***
Kon bisan unsa na lang ang mga hulga nga makit-an, inay nga modawat ug makat-on og mga pagtulon-an, mahimo nga hapit na g'yud ang kinutoban. Kon bisan ang labing mabuot nga mga tambag dudahan, bisan naggikan sa mga tawo nga labing gisaligan, mahimo nga di na g'yud haom sa katungdanan.
Kon magbuot-buot na lang og pasangil sa mga gidumtan, bahala na kon ang kabakakon mabisto sa kadaghanan, wa na kinahanglana nga magkonsabo pa ang tanan nga nayatakan. Kay ikaw na man mismo ang nagkawot sa lang-og nimo nga lubnganan.
- Latest
