Nabitik sa mga palusot
Ambot may nahibilin pa ba sa listahan sa mga palusot nga wa pa magamit sa Malakanyang sa mga kontrobersiya nga namugna sa mga sulti o mga lakang ni Presidente Rodrigo Duterte sukad sa pagbanos niya sa Malakanyang usa ka tuig ug tulo ka buwan nang nilabay.
Kinaham nga panagang sa mga tigpamaba ug mga magtatambag ni Duterte mao nga angay'ng sabton ang iyang gigikanan: Nagdako siya sa usa sa labing himalikas nga distrito sa Dakbayan sa Davao ug ang mga pasiaw sa mga Bisaya usahay lisod nga sabton sa mga Tagalog.
***
Mao ni ilang palusot dihang nagbaha na ang mga balikas ni Duterte sa hapit matag adlaw niyang diskurso ug bisan atol sa iyang State of the Nation Address (SONA) ug dihang nainsulto ang kababayen-an ug ubang hut-ong sa mga insulto ug bugal-bugal nga iyang gibakwi isip komedya.
Dihang nitumaw ang makalibog niyang mga pamahayag, giawhag nila ang media sa kaulohan sa pagpangutana sa media sa Davao nga kamaong mobasa sa iyang mga lihok aron matugkad unsay tinuod niyang gipasabot. Apan ang media sa Davao mismo nikumpisal nga utro sab silang naglibog.
***
Dihang nasakpan ang sayop niyang mga pamahayag, nga ang pipila napamatud-an g'yud nga dagkong bakak, apil nang iyang pag-angkon nga nag-imbento lang og mga numero sa bank account nga iyang giingong gi-depositohan sa kinawat nga katigayonan ni Senador Antonio Trillanes, niawhag ang Malakanyang nga sabton ang lahi niyang estilo.
May pakapin pang pasidaan nga nahibawo si Duterte sa iyang gibuhat. Ug nga posibleng ang pagluwat og sayop nga kasayuran tinuyo ug kabahin sa mas dakong taktika pagbisto sa kahiwian sa iyang mga kaatbang.
***
Sa laktod, gitambagan ta sa Malakanyang nga di tuohan si Presidente Duterte. Ambot tinuyo ba o wa lang kamatngon nga mao ni gidangatan sa tanan nilang palusot, ilang gipintal si Duterte nga tinuoray'ng kalibogan.
Nga di seryusuhon ang tanang sulti kay mahimong lain ang gipasabot. Nga mahimong motuyo og panglingla aron di mabantayan ang tinuod niyang katuyoan. Human sa usa ka tuig ug tulo ka buwan nga pagtugyan sa nasud ngadto sa pangulo nga mahimong mousab sa iyang hunahuna bisan unsang orasa sa bisan unsang hinungdan, makasalig ba ta niya?
- Latest
