40 ka adlaw nga kampanya
Sa kataposan, duna nay mahimo ang mga parokya nga nagtinguha pagpadayag sa ilang kahingawa sa way pupanagana ug morang way kinutoban nga pagpanglaktod pagpatay sa mga gipasanginlan nga nahilambigit sa ilegal nga drugas: Gidasig sila sa pagbagting sa ilang mga lingganay matag alas-8 sa gabii sud sa 40 ka adlaw.
Sa kataposan, may mahimo na ang mga parokyano sa pagpadayag sa ilang kabalaka ug kahimangod sa pagkakalas sa kapin sa 10,000 na ka kinabuhi sa gubat batok sa ilegal nga drugas: Giawhag sila sa pagdagkot og kandila sa ilang mga nataran sud sa 40 ka adlaw.
***
Kabahin lang ang duha nga nahisgutan sa ibabaw sa upat ka lakang nga gisugyot sa Catholic Bishops Conference of the Philippines (CBCP) sa pagduyog sa lab-as nga kampanya batok sa sunudsunod nga mga pagpamatay nga gipasiugdahan sa way paghinulsol nga mga kriminal ug sa pagpangiyugpos lang sa katawhan atubangan sa bangis nga mga krimen.
Ang pamahayag sa CBCP gipirmahan ni Arsobispo Socrates Villegas, ang ligdong ug isog nga nasudnong presidente sa CBCP, kansang duha ka tuig nga termino pormal nang mapupos karong Disyembre.
***
Ang pagbagting sa mga lingganay gikan sa Septiyembre 23 hangtod sa Nobyembre 1 karong tuiga mag-agad sa pagtugot sa mga obispo. Dinhi sa Sugbo, si Arsobispo Jose Palma ang agdon kon mosalmot ba sa kampanya nga sa labing unang higayon suwayan sa pagpatuman sa tibuok nasud.
Gilusad na ang samang kampanya sa pagbagting sa mga lingganay sa Artsidyosesis sa Manila ubos sa liderato ni Arsobispo Antonio Kardinal Tagle ug sa Artsidyosesis sa Lingayen Dagupan ubos sa pagduma ni Arsobispo Villegas.
***
Ang pagdagkot og kandila gidasig sang himuon sa mga minteryo, sa mga dapit nga tapokan sa daghang tawo ug sa mga namatyan sa mga biktima sa extrajudicial killings (EJKs). Giawhag sang katawhan paglitok sa Santos nga Rosaryo ug pagkalawat isip halad sa mga kalag sa mga nangamatay.
Nangiliyupo sang CBCP sa katawhan sa pagtampo sa pagpa-eskuyla sa nailong mga anak sa mga biktima sa EJKs, o sa ilang mga igsuon, o sa panginabuhi sa ilang pamilya. Matod sa CBCP ang pagtabang sa mga nagkinahanglan makabawi sa daghang kasal-anan. Ang paglimos makaalim sa mga panagsungi.
- Latest
