Way hustisya ni Kian
Bisan nangligdas ang kaliboan ka patay'ng lawas sa gubat batok sa ilegal nga drugas, nga ang kasagaran sa mga biktima gipasanginlan nga nisukol sa kapolisan, may pipila nga nitiyabaw apan ang kasagaran nangiyugpos, may niabiba pa gani sa mga polis sa pagsunod sa sugo ni Presidente Rodrigo Duterte nga patyon ang mga durugista.
Dihang napakyas ang mga imbestigasyon sa Commission on Human Rights (CHR) ug gibungulbungolan ang mga awhag sa hustisya tungod sa kahadlok sa mga saksi ug mga tagtungod sa pagbarug, nidangop ang mga nagpakabana sa pangaliya nga moabot nang adlaw sa panudya.
***
Human sa kamatayon sa 17 anyos nga Kian Lloyd delos Santos, nga gipasanginlan sa mga polis nga tigpayuhot og drugas apan nabantang sa CCTV sa barangay nga wa diay armas, wa diay mosukol, ug labaw sa tanan linuog diay nga gipatay, niabot na bang kinutoban sa laktod nga pagpamatay?
Karong niapil na og kondenar sa bangis nga pagpatay ang Departamento sa Edukasyon (DepEd) ug ang mayoriya sa Senado, human nga nangiyugpos lang sa nangaging extrajudicial killings (EJKs), niabot na ba ang dugay nang gihandom nga adlaw sa panudya?
***
Nilusad dayon og imbestigasyon ang CHR. Bisan wa kaugpo ang nahauna nilang mga pakisusi. Nisaad og independenteng imbestigasyon ang Senado. Bahala na kon maayo lang mangisog batok sa di mga sakop sa pamilya sa presidente.
Nipasalig ang Internal Affairs Service (IAS) sa kapolisan nga di sila managana pagrekomendar nga ikiha ug silotan ang mga polis nga nipatay ni Kian kon mapamatud-an nga nag-abuso. Nipasalig sab ang National Bureau of Investigation (NBI) og buwag nga pakisusi.
***
Sa di pa ta molayat sa sayo nga pagsaulog nga makaangkon og hustisya silang Kian ug ang mga nag-una niya, maayo tingaling hinumdoman ang nahitabo nilang Supt. Marvin Marcos ug kaubanan sa Criminal Investigation and Detection Group (CIDG) 8 nga girekomendar sa IAS nga ikiha og murder tungod sa kamatayon ni Albuera, Leyte Mayor Rolando Espinosa Sr.
Apan gi-downgrade sa Department of Justice (DOJ) ang kaso ngadto sa homicide, gibalik ni Duterte silang Marcos ug kaubanan sa serbisyo ug gipasaligan nga, bisan masayop pa, duphan niya sila ug pasidunggan sa matinud-anong pagpatuman sa iyang gubat sa drugas.
- Latest
