Way mobarug batok ni Paolo
Way mangahas og tulisok ni Davao City Vice Mayor Paolo Duterte, kamaguwangang anak lalaki ni Presidente Rodrigo Duterte, nga nahilambigit sa mga eskandalo sa Bureau of Customs (BOC). Kay bisan nipasalig ang presidente nga mokanaog siya sa katungdanan kon may affidavit batok sa mga sakop sa iyang pamilya, may sukaranan gihapong kabalaka nga mas espeso ang dugo.
Labi na nga si Duterte dali ra kaayong makabakwi sa iyang mga sulti. Lisod pamalandungon ang kalbaryo nga mahiagoman kon iyang duphan ang iyang anak ug duna pay lima ka tuig nga nahibilin sa iyang termino.
***
Apan nagpadayon ang mga huhungihong sa kalambigitan sa batan-ong Duterte sa pagpayuhot og mga kontrabando sa pantalan sa Davao ug sa ubang kahiwian sa BOC. Ang resource persons nga niatubang sa mga imbestigasyon sa Kongreso pulos nakadungog sa kalambigitan sa ngan sa anak sa presidente apan wa direktang makakita ni makasulti niya.
Mao nga ang mga imbestigador sa Senado ug sa House of Representatives, nga bagis kaayo batok sa ubang mga ginganlan, nikalit lang og kamapanagan-on dihang giawhag na sa pagdapit sa anak ni Duterte.
***
Maong napugos si Senador Antonio Trillanes IV pagbanhaw sa karaang dokumento nga unang nihingan sa batan-ong Duterte: Ang memorandum sa Presidential Anti-Smuggling Group (PASG) nga pinetsahan og Disyembre 7, 2007 (atol sa ikapitong tuig sa pamunoan ni kanhi Presidente Gloria Macapagal Arroyo) nga nilambigit ni Paolo sa pagpayuhot og sports utility vehicles, luxury vehicles, bugas humay, asukar, ug ukay-ukay.
Ang dokumento gipirmahan ni PASG Team Leader 2 Rosauro Bautista ug gipada ngadto ni PASG Deputy Director for Intelligence Ruel Lasala. Nidason ni sa nahaunang report sa National Bureau of Investigation nga pinetsahan og Disyembre 4, 2007.
***
Ginganlan ang "business partner" ni Paolo nga si Glen Escandor, giingong anak ni Koronel Escandor ug tag-iya sa Mandaya Hotel. Giingong gikan sa Japan ug Estados Unidos ang luhong mga sakyanan. Gilambigit sab ang Muslim nga asawa ni Paolo. Nga giingong responsable sa ilegal nga importasyon sa ukay-ukay, bugas humay, ug asukar.
Apan bisan pa o tungod sa kusganong awhag ni Trillanes, way alyado ni Duterte nga ganahang mopatawag ni Paolo ug ni bisan kinsang ginganlan niyang mga kasosyo.
- Latest
