Saad mao’y nausab

Paglingkod niya sa Malakanyang, nipasidaan si Presidente Rodrigo Duterte nga labihan ka-determinado sa iyang kampanya batok sa pangurakot nga kon makatimaho lang o makabantay og bisan gamay’ng pasumbingay sa binuang iya dayong taktakon bisan ang labing suod niyang mga tinudlo ug labi na g’yung mga sakop sa iyang pamilya.

Tuod man, sa unang tuig sa iyang pamunoan may mga sakop sa gabinete nga gipanangtang ni Duterte tungod lang sa mga pasangil sa kahiwian batok nila, bisan way kasong napasaka, way imbestigasyon nga nahimo, wa gani kahatagi og higayon pagpanalipod sa ilang kaugalingon.

* * *

Mao nga makapakugang ang bag-ong lagda nga giluwatan atubangan sa sibaw nga mga huhungihong sa kalambigitan sa iyang anak nga si Davao City Vice Mayor Paolo Duterte sa smuggling sa mga kontrabando ug ubang anomaliya sa Bureau of Customs:

Di na alisngaw lang. Di na pasumbingay lang. Pormal nga affidavit na ang gikinahanglan. Kon may mopirma og affidavit nga mo-detalye sa ilegal nga kalihokan ni Paolo, nipasalig si Duterte nga di siya maglangan pagkanaog dayon sa katungdanan kay gikapoy na sab siya sa daghan ug dagkong gimbuhaton isip presidente.

* * *

Hangtod sa akong pagsuwat ini, wa pay nangahas og pirma og affidavit batok ni Paolo. Bisan ang customs broker nga nihisgot sa iyang ngan way ek sa tanyag sa presidente. Di lang tingali tungod sa kahadlok kon dili tungod sab sa kahanap di ba g’yud duphan ni Duterte ang iyang anak.

Kay bisan kinsa makahimo pagpirma og affidavit. Ang mga pasangil sa affidavit kapamatud-an lang kon mosangpot sa pagpasaka og kaso ug paghusay sa korte.

* * *

Nidaog si Duterte tungod sa gisaad nga kausaban. Apan iyang mga saad mao’y nahiagom sa labing dagkong kausaban. Iyang labing dakong saad mao ang pagsulbad sa problema sa drugas sa unang tulo ngadto sa unom ka buwan sa iyang pamunoan.

Human nangayo og dugang unom ka buwan nga lugway, niangkon si Duterte nga mahimong nagkinahanglan siya sa kinatibuk-ang unom ka tuig nga termino pagpapas sa drugas. Karong bag-o, nikumpisal na si Duterte nga di g’yud diay niya masulbad ang problema kay taas kaayo ang atong kabaybayonan ug daghan kaayo tang isla nga kapayuhotan sa ilegal nga drugas.