Pagpatuyang sa gibati
Kon patuyangan silang Presidente Rodrigo Duterte ug iyang mga sinaligan, mangligdas sa kadalanan ang tanan nilang gipasanginlan nga mga kriminal ug mga durugista, mapapas nang Court of Appeals (CA) ug mahukasan sa ilang lisensiya pagka manlalaban ang mga mahistrado, makandadohan ang Kongreso ug mausab ang 1987 Constitution.
Di kana ra. Kon way makapugong nila, si Duterte ang mouna paglugos sa langyawng misyonera nga sama kaguwapa sa artista ug makapanlugos ang mga sundawo ug mga polis og hangtod katulo. Ug mahimo rang ibasura ang kaminyuon kon di na malipayon ang magtiayon.
***
Labing uwahing puntirya sa kasuko ni Duterte mao ang Commission on Human Rights (CHR). Nga iyang giisip nga maoy labing dakong babag sa iyang kampanya batok sa ilegal nga drugas. Ambot may nakahunghong ba niya nga ang CHR di angay’ng daginuton.
Tungod sa talagsaon niyang popularidad, ang CHR inutil sa ilang gimbuhaton. Ang mga imbestigasyon sa CHR sa mga pasangil sa extrajudicial killings sa Sugbo ug ubang bahin sa nasud wa kaugpo. Kay pulos nahadlok ang mga saksi ug mga tagtungod.
***
Apan ang CHR di diay mahimong papason tungod lang sa sulti ni Duterte. Kay segun sa kadagkoan sa ahensiya, may mas kuti diay nga panginahanglan, ang tukma nga kausaban sa batakang balaod.
Wa hinuoy arang ni Duterte. Ang iyang hingpit nga pagkontrolar sa nagkalainlaing mga institusyon sa gobyerno mahimong mopasayon sa pag-usab sa sistema sa gobyerno ug pagpapas sa tanang babag sa pagpabarug og lab-as nga diktadura.
***
Si Duterte wa matawo gahapon. Maong atubangan sa lapad nga suporta sa kinabag-an sa katawhan sa bisan unsa nga kuwestiyonable niyang mga sulti ug mga lakang sa kapin sa tuig na niyang pamunoan, masuk-anong gikutikuti sa pagsalikway ang matag usa sa mga pagsaway batok sa iyang pamunoan.
Kay ang nanggungis nang bagis sa Davao maoy labing nasuhito nga ang iyang kahumot di dumalayon. Nga ang lehitimong mga pagsukwahi sa iyang mga pagpatuyang motuhop ra sa kabuot ug panghunahuna sa katawhan. Siya ang labing nahibawo nga way aso nga makumkom. Nga sa di madugay mabantang na sa katawhan ang tinuod niyang dagway. Nga gawas nga di nila magustohan, mahimo sang makaaghat nila pagpalayas niya sa katungdanan.
- Latest
