Paglingkawas sa Binisaya
Paglingkawas sa talikala sa pagka-ulipon sa langyaw'ng dila. Mao ni ang tumong sa nasudnong presidente sa Lubas sa Dagang Bisaya (LUDABI), Atty. Leo Zaragoza, sa iyang determinadong paningkamot pagpalambo sa pinulongang Bisaya sa nagkalainlaing bahin sa Kabisay-an ug Mindanao.
Gipili niya ang Sugbo nga mao'y labing haom nga sukaranan sa kampanya nga maglakip sa pagtabang pag-andam sa mga magtutudlo sa paggamit sa Binisaya sa unang tulo ka tuig sa pagtungha sa mga tinun-an pagtanyag og kurso sa kolehiyo alang sa mga magtutudlo sa dilang Bisaya.
***
Nipasabot si Zaragoza nga ang labing mahinungdanon nga tumong sa kampanya mao ang pagpahigmata sa katawhan, labi na sa mga bata, nga dakong sayop ang pagtuo nga ang kamaayong mo-Iningles mao'y timaan sa kalantip sa salabotan.
Nabalaka si Zaragoza nga ang laksot nga kabilin sa mga langyaw nga niulipon sa nasud mao'y nakapakumbinser sa katawhan nga angay'ng ikauwaw ang atong pinulongan ug busa ang pagkat-on ini di mapuslanon kay makapasamot lang sa kaubos sa ilang kahimtang.
***
Usa sa kampanya nga gilusad ni Zaragoza mao ang pag-awhag sa lokal nga mga opisyal sa Sugbo sa pagbutang og tukma nga Binisaya nga mga ngan sa tanang buhatan sa kagamhanan, kadalanan ug pribadong mga bay patigayon.
Di papason ang Cebu City Hall apan angay'ng pa-ibabwan sa mas dakong ngan nga "Balay-Dakbayan sa Sugbo." Ang Kapitolyo mas haom sab nga nganlan og "Balay-Lalawigan sa Sugbo" ug ang nagbuntaog nga ulohan sa tigbayon markahan sa mas tukmang pahinumdom nga, "Ang gahom sa kagamhanan naggikan sa katawhan."
***
Gihulagway ni Zaragoza nga dakong eskandalo ang gihimo karon sa mga bay balaoranan sa mga lalawigan, dakbayan ug kalungsoran nga ang mga magbabalaod ug ang mga magbubuhis nga nitambong sa ilang sesyon pulos Bisaya apan moinsistir g'yud sa di kaayo larino nilang Iningles.
Way kalainan ang mga husay sa hukmanan sa Mindanao ug Kabisay-an nga iyang natambongan. Pulos Bisaya ang huwes, ang mga manlalaban, sinumbong, kihante, saksi, ug kawani. Apan maglibug-libog g'yud sa ilang Iningles bisan mas laktod untang mapatigbabaw ang Hustisya kon mas magkasinabtanay sa Binisaya. Bahala nang huwes ug iyang mga kawani nga mohubad ngadto sa Iningles alang sa mas taas nga mga hukmanan.
- Latest
