Hanig sa diktadura?
Sa usa lang ka pamilok, gisalikway ni Presidente Rodrigo Duterte ang tanang pasalig nga ang martial law karon sa Mindanao mas makiangayon ug mas makitawhanon kay sa balaod militar nga gipahamtang ni Ferdinand Marcos niadtong 1972 nga nakapatumaw sa dul-an sa duha ka dekada nga diktadura.
Nanlipaghong ron sa kauwaw ang mga nipasalig nga tahuron nila ang mga limitasyon nga gipahamtang sa 1987 Constitution nga naglakip nilang Senate President Koko Pimentel, sa liderato sa Armed Forces of the Philippines (AFP) ug Philippine National Police (PNP), ug iyang mga tigpamaba sa Malakanyang.
***
Mao pa g'yoy pagluwat sa Department of National Defense (DND) ug PNP og managsamang lagda nga ang martial law sa tibuok Mindanao di mosuspenso sa konstitusyon, mga bay balaoranan, ug sibilyan nga mga hukmanan.
Apan sa iyang pakigpung atubangan sa kasundalohan sa Jolo, Sulu, niadtong Sabado, nideklarar si Duterte nga di siya motuo sa Kongreso ni sa Korte Suprema kay wa sila sa natad sa panggubatan. Ang bugtong niyang tuohan mao rang mga polis ug mga sundawo kay sila ang nagkadugo ug nibuhis sa ilang kinabuhi pagsumpo sa mga terorista.
***
Gitataw sa DND ug PNP nga ang warrantless arrests kinahanglang mosubay sa mga lagda sa korte nga ang opisyal nga modakop og suspek nga padung nang mohimo, o padayong naghimo, o mao pay paghimo og krimen kinahanglan nga dunay personal nga kasayuran sa krimen.
Apan giawhag ni Duterte ang militar ug kapolisan pagdakop ni bisan kinsa ug pagsiksik sa bisan unsang bay kay ubos sa martial law wa sila magkinahanglan og warrant.
***
Segurong dasonan sa mga senador ug mga kongresista ang martial law. Maong way sukaranan ang insulto ni Duterte nga di niya tuohan bisan unsa'y sulti sa Kongreso. Wa pa say petisyon nga nagkuwestiyon sa martial law. Busa wa g'yud kinahanglana nga bangilan nang daan ni Duterte ang Korte Suprema.
Mas makapaalarma hinuon nga ang iyang pagmando sa mga polis ug mga sundawo sa pagdakop ni bisan kinsa ug pagsud sa bisan unsang bay mao'y hingpit nga pagsalikway sa konstitusyon. Nagsugod na ba si Duterte og hanig sa gikabalak-ang ambisyon niya pagtukod og diktadura?
- Latest
