Epekto sa martial law
Nakugang ko sa pangutana sa usa ka hamtong nga molupyo sa Consolacion nga akong nalabyan samtang nagbaktas paingon sa sibyaanan sa niaging semana: "Kon martial law na sa Mindanao, nganong on the air pa man ang mga estasyon sa radyo ug telebisyon didto?" Ug wa lay nakasulti niya nga padayong nanggawas ang mga pamantalaan sa mga dakbayan ug lalawigan sa Mindanao.
Tingali nahinumdom lang siya sa nahitabo sa martial law nga gideklarar ni Ferdinand Marcos 45 ka tuig nang nilabay. O tingali nituo lang siya ni Presidente Rodrigo Duterte nga ang iyang martial law pareha ra sa martial law ni Marcos.
* * *
Dul-an usa ka semana human gideklarar ang martial law ug gisuspenso ang pribilehiyo sa writ sa habeas corpus sa Mindanao, way nahitabo nga lapad nga dinakpanay: Ma-sibilyan man, o suspitsadong mga sakop sa Maute group, o ang politikanhong mga kaatbang ni Duterte.
Way mga patigayon nga gitak-opan ni gisakmit, way agresibong kampanya pagsakmit sa ilegal nga mga armas, pagbungkag sa gikaintapan nga private armies sa mga politiko ug pagpuhag sa mga sindikato sa mga tulisan, bandido ug durugista sa Mindanao.
* * *
Labing dakong epekto sa martial law sa Mindanao mao ang grabeng kahuot sa trapiko gikan ug paingon sa Marawi ug Iligan ug kasilinganang mga dapit nga gidangpan sa dul-an 200,000 ka bakwet nga mga bata ug mga dagko. Tungod ni sa nanguhong nga checkpoints sa militar ug kapolisan pagseguro nga way mga sakop sa Maute group nga makagawas ug makasud sa Marawi.
Mahimong ang kamatuoran apil sa nakalas sa gubat sa Marawi. Hangtod karon niinsistir ang militar nga way mga sibilyan nga nabihag ni napatay. Wa say klarong ihap sa Maute, 15 segun sa AFP o kapin sa gatos suma ni Defense Secretary Delfin Lorenzana.
* * *
Ang kadaghan sa mga higot sa martial law ubos sa 1987 Constitution nakaaghat ni Duterte pag-awhag nga usbon ang batakang balaod aron mabanhaw ang gahom sa presidente pagpili sa labing kusganong mga paagi sa pagpatuman ini.
Mahimo hinuong pasiuna lang ang martial law sa Mindanao. Maong inay mopasalig nga kontrolado ang sitwasyon, nipasidaan si Duterte sa posibleng pag-apil sa Kabisay-an ug Luzon.
- Latest
