Sayop lang ang hubad?
Haskang daghana nang hubad sa sulti ni Presidente Rodrigo Duterte nga gihulga siya og gubat nilang Chinese President Xi Jinping ug Prime Minister Li Keqiang dihang giprangkahan niya sila nga moinsistir ang Pilipinas sa pangangkon sa kabahin sa West Philippine Sea ug nagplano sa pagkuha og lana gikan sa giilogan nga teritoryo.
Nipasangil ang mga kaatbang ni Duterte nga nikakak siya ug mahimong hingpit nang motahan sa dakong bahin sa teritoryo sa Pilipinas ngadto sa China. Apan ang iyang mga dumadapig niingon nga nagmatuod lang ang insidente nga wa g'yud ta'y dag-anan kon mosukol sa China.
***
Ang sulti ni Duterte nakapatumaw dayon sa mga reaksiyon nga di niya masalikway ni mabalibaran tungod sa ilang ka-lehitimo:
•Niawhag ang mga senador nga mopasaka og diplomatic protest ang Department of Foreign Affairs (DFA) sa klarong panghulga sa China;
•Nitambag si Supreme Court Senior Associate Justice Antonio Carpio nga angay'ng mopasaka og laing kaso sa United Nations (UN) pagpatuman sa nahaunang kadaogan sa Pilipinas batok sa China sa Permanent Court of Arbitration (PCA) sa The Hague; ug
•Nisugyot si kanhi Foreign Affairs Secretary Albert del Rosario nga mokuyog pagbalik ang Pilipinas sa patrolya sa Estados Unidos sa Spratlys.
***
Sa pikas nga bahin, nagyagaw ang katin-awan sa iyang mga sinaligan:
•Si Presidential Spokesman Ernesto Abella niingon nga klaro ang baruganan ni Duterte sa di pagtahan sa atong sobereniya; ug
•Nipasalig si Foreign Secretary Alan Peter Cayetano nga ang panagsulti nilang Duterte, Xi ug Li nasentro sa pagpugong di sa pagpanghulga sa gubat ug nga napatigbabaw ang pagtinahuray sa mga katungod sa duha ka nasud di ang panghasi.
***
Bisan ang China nisuway og tabang og pasabot unsa g'yuy na-istoryahan nilang Duterte, Xi, ug Li. Matod ni Hua Chunying, tigpamaba sa Foreign Ministry, nauyonan ang pagpalambo sa komunikasyon sa mahinungdanong mga isyu nga paghusay sa mga panagsungi sa malinawong paagi.
May lab-as hinuong pangagpas ang Philippine Ambassador to China, si Chito Sta. Romana: Mahimong nasayop lang si Duterte paghubad sa sulti ni Xi. Matod ni Sta. Romana igo lang nipasidaan si Xi og panagsungi apan ang pagsabot ni Duterte mao nga nanghulga na si Xi og gubat.
- Latest
