Freeman Opinion ( Leaderboard Top ), pagematch: , sectionmatch: 1

Dinalidali nga buotbuot

May sukaranan ang pagtunglo sa mga aktibista sa kadalanan sud na karon sa pila ka dekada sa mga kundisyon nga gipahamtang sa World Bank (WB), International Monetary Fund (IMF) ug ubang mga institusyon bugti sa ilang pagpautang sa kabos nga mga nasud sama sa Pilipinas.

Kay abunda ang mga ebidensiya nga ang binilyon ka dolyar nga ilang gipautang gawas nga napakyas sa pagpalambo sa nabangkarota nga mga ekonomiya nipasamot pa hinuon sa kalapad sa katimawa sa katawhan. Ug di lang tungod sa pangurakot sa mga tagduma sa nangutang nga mga nasud.

***

Inay laslasan, padayon nga gipun-an sa WB, IMF ug uba'ng mga institusyon ang di makiangayon nga mga kundisyon. Pipila sa mga kundisyon sa langyaw'ng mga utang nga nakapa-ut-ot labi na sa mga kabos:

• Pagpabiling ubos sa suholan sa mga mamumuo sa pribadong mga kompaniya ug mga kawani sa gobyerno;

• Paglaslas sa tinuig nga nasudnong budget sa kanasuran; ug

Freeman ( Article MRec ), pagematch: 1, sectionmatch:

• Pagpatuman og lapad nga pagdaginot sa mga gastohan gikan sa nasudnong panudlanan.

***

Nikumpisal na karon ang kadagkoan sa mga institusyon nga napakyas ang ilang pautang sa pagpalambo sa mga ekonomiya sa utangan nga mga nasud. Gani, kasagaran sa mga biktima nagbalikbalik og pangutang kay nisamot hinuon ang kalisod.

Giangkon sa mga institusyon nga ang labing dagko nilang sipyat mao ang kapakyas sa (1) pagsusi sa aktuwal nga kahimtang sa nangutang nga mga nasud, (2) pagkonsulta sa mga tagduma sa nasudnong mga ekonomiya ug (3) pagpahaom sa mga kundisyon sa dinaliang mga panginahanglan sa kinabag-an sa populasyon.

***

Ang kalaksot sa agi sa WB, IMF ug ubang mga institusyon, di hinuon makatabon sa kabinuang sa pagsalikway ni Presidente Rodrigo Duterte sa mga hinabang sa European Union (EU) tungod lang sa ilang pagsaway sa iyang gubat sa drugas. Ang pagbisto ni Socioeconomic Planning Secretary Ernesto Pernia nga wa matuki sa gabinete ang isyu nagmatuod nga dinalidali ug buotbuot ang iyang pag-umol sa desisyon.

Kay bisan unsaon niya og pamalikas, di malalis ni Duterte ang kamakiangayon sa nag-unang mga kundisyon sa hinabang sa EU alang sa Pilipinas ug ubang kanasuran: Ang pagpatigbabaw sa demokrasya, rule of law ug tawhanong katungod; ug pagsalikway sa silot sa kamatayon.

leo_lastimosa@abs-cbn.com.

Freeman ( Article MRec ), pagematch: 1, sectionmatch:
  • Follow Us: